Төрийн алба нам нам дамжиж сэлгүүцэх увайгүй этгээдүүд эсвэл даргад долгинож, сонгуулиар л тодрогсдын орогнох газар болдог гаж тогтолцоо бий болоод уджээ. Улс эх орон, ард түмний төлөө санаачилга идэвх гаргах ч тэнхэлгүй ийм бүтэц орон нутаг, төрийн шат шатны талбарт бөөс шиг үржиж хачиг шиг шигдэцгээх тусам хөгжлийн тухай ойлголт ор мөргүй болох нь. Хүн амынхаа ажиллах хүчний судалгааг ч гаргаж дийлэхгүй хэр нь популист маягийн хэлбэрдэлтэд гаршсан үл бүтэх нөхдүүдийг аль ч шатны төрийн байгууллагад ажиллах эрхийг нь хасаж хариуцлага тооцдог хууль батлах шаардлагатай.

Хөгжлийн бодлогоо тодорхойлох нь бүү хэл хүн амын сэтгэлгээний түвшин, ахуй амьжиргааг өөд нь татахаас хойргошоож унтаа байдалд оруулдаг дарга нарыг төрийн албаны шалгалтаас гадна ёс зүй, ухамсар хариуцлагын зарчим хэм хэмжээг шаардах ёстой.

Сонгууль ойртох тусам дөрвөн жил зүгээр хэвтсэн энд тэндхийн намын буянаар сэхэл авч, сонгогчдын саналыг худалдаж авах төсөр аргад толгойгоо гашилгах этгээдүүдэд дахин төрийн сэнтийд залрах нь бүү хэл хөгжлийн үр дүнгийн тайлангаа хамгаалж чадахгүй бол хууль хяналтын байгууллагаар шалгаж, төрийн албыг үл тоож, үхмэлжүүлсэн гэмт хэрэгт хамааруулдаг байх...

Д.ЭНХБАТ