Монгол Улсад "Лада" загварын автомашины "Show room" нээгдэж байна. Тиймээс бид амралтын өдрөөр автомашин сонирхогч уншигч нартаа зориулан энэхүү мэдээллийг бэлтгэлээ. Бид "Руссо Моторс" ХХК-ийн менежер Д.Ганхүүгээс мэдээлэл авсан юм.

-Та бүхэн “Лада” загварын автомашинаар монголын зах зээлийн хэдэн хувийг хангах зорилготой ажиллаж байна?

-Бид монголын зах зээлийн 15 хувийг “Лада” автомашинаар хангах зорилготой ажиллаж байна. Гэхдээ манай улсад үйлдвэрээс гарсан шинэ машиныг бэлэн мөнгөөр шууд худалдаж авдаг хүмүүс цөөхөн л дөө. Яагаад гэхээр Монгол Улсын хүн ам бусад улс орнуудтай харьцуулахад цөөхөн, өнөөдөр иргэдийн амжиргааны түвшин ямар байгааг бодолцож үзэх хэрэгтэй л дээ. Бидний зорилго зөв талдаа жолооны хүрдтэй шинэ автомашиныг Монголын зах зээлд боломжийн үнээр худалдаалах. Жишээлбэл, “Lada Vesta Cross” загварын дунд гарын жийп машинд ашгаа нэмээд зарвал 50 гаруй сая төгрөг болох ёстой. Гэвч бид ашиг нэмэлгүйгээр 49.9 сая төгрөгөөр борлуулж байна. Товчоор хэлбэл зөв жолооны хүрдтэй, шинэ автомашиныг 50 сая төгрөгт багтаан борлуулах ёстой гэсэн бодлого баримталж байгаа.

-1980, 1990-ээд оны “Лада” автомашины загвар шинэчлэгдэж Монголд орж ирсэн гэдгийг сонссон хүмүүс “Одоо машиныхаа хамрыг ухаад зогсох хүн олдох уу” гэж хариулж байсан л даа?

-1980, 1990-ээд оноос хойш “Лада” автомашины загвар шинэчлэгдээд л байсан. Тухайн үед ченж нар хөлөөр нь оруулж ирэн зардаг байсан ч Солонгос, Япон автомашинд дарагдсан. Яагаад дарагдсан бэ гэхээр Зөвлөлт холбоот улс задрах үед хүнд үйлдвэрлэлүүд нь уналтад орсон. Одоо л буцаж сэргэж байна шүү дээ. Өнөөдөр бодит амьдрал дээр “Лада” машиныг ухаад зогсож байсан үгүйг нь бид мэдэхгүй шүү дээ. Тэгээд л “Лада” машин ухуулдаг л” гээд яриад байдаг. Яг үнэндээ тухайн үеийн автомашинуудаас хамгийн чанартай нь “Лада” байсан гэдэг. Автомашин үйлдвэрлэгчид маш олон цуврал загварыг үйлдвэрлэхэд зарим нь муу байхад үлдсэн хэсэг нь амжилттай зах зээлд борлуулагддаг. “Лада” европ стандартыг үйлдвэрлэлдээ нэвтрүүлсэн. Өөрөөр хэлбэл дэлхийн хамгийн өндөр зэрэглэлийн “Евро-5” стандартын хөдөлгүүртэй. Мөн үйлдвэрлэх технологи нь “Nissan”-ийн хөрөнгө оруулалтай. Автомашин үйлдвэрлэж буй шат дамжлага япон, европийн стандарттай учраас технологийн хувьд ямар ч асуудалгүй болсон нь хамгийн том давуу тал. Европ стандартаар ОХУ-ын хэрэглэгчдэд зориулан бүтээсэн болохоор ердийн автомашинтай харьцуулахад туулах чадвар өндөр, туулах чадвар маш сайн, хүйтэнд тэсвэртэй, дотор салоны битүүмжлэл сайн дулаанаа гадгаш алддаггүй.

-Шинээр автомашин худалдан авсан хүмүүст үйлдвэрлэгч болон дистрибьюторын зүгээс ямар баталгаа өгч байгаа вэ?

-Хамгийн чухал зүйл бол үйлдвэрлэгчийн баталгаа. Тухайн машинд ямар нэгэн асуудал гарвал шууд засч өгдөг. Гэхдээ хэрэглэгчийн өөрийн буруутай үйлдлээс болж гарсан эвдрэл, гэмтэлд үйлдвэрлэгчийн зүгээс ямар нэгэн хариуцлага хүлээдэггүй. Хэрэглээний явцад элэгддэг эд ангийг сольж өгөхгүй. Зарим хүмүүс ийм эд ангиа солиулах гээд байдаг. Үүнийг анхаараасай гэж бодож байна. Харин дистрибьютор буюу "Руссо Моторс" ХХК-ийн зүгээс эхний 20 мянган км-т техник үйлчилгээнд таван удаа үнэгүй орж болно. Үүнд тодорхой хуваарьтай байна. Манай компанийн үндсэн зорилго шинэ машин зарж бизнес хийх биш.

Бидний алсын хараа монгол хүмүүс автомашинаас болж битгий осолд орж амь насаа битгий алдаасай гэж хүсч байна. Монголд явж буй автомашины 90 хувь нь 10-аас дээш жилийн насжилттай, импортоор орж ирсэн машины 80 гаруй хувь нь долоогоос дээш жилийн насжилттай байдаг. Хөдөлгөөнд оролцож буй автомашины 70 гаруй хувь нь буруу талдаа жолооны хүрдтэй. Гэтэл манай улс зүүн жолооны хүрдний дүрэмтэй улс. Ийм байхад баруун жолооны хүрдтэй машинтай замын хөдөлгөөнд оролцоход тэмдэг, тэмдэглэгээ, гэрлэн дохионы байрлал тохирдоггүйгээс болж осол гарах тохиолдол байдаг.

-"Лада" загварын автомашины аюулгүйн ажиллагааны системийн талаар ярихгүй юу?

-1980, 1990-ээд оны үед автомашины үйлдвэрлэл хөгжөөгүй байх үед маш хүнд төмрөөр эд ангий болон эх биеийг нь хийдэг байсан. Одоо дэлхий дахинд автомашины үйлдвэрлэл өндөр түвшинд хөгжсөн учраас төмөр сайтай хийх шаардлагагүй болчихсон л доо. Үүнд зарцуулах хөрөнгөө жолооч болон зорчигчийнхоо аюулгүй байдал, амь насыг хамгаалахын систем, технологи руу хийдэг болсон. "Лада" загварын автомашинуудын аюулгүйн ажиллагааны систем нь өндөр түвшинд хийгдсэн байгаа.

-Хөдөлгүүрийн багтаамж нь хэд вэ. 100 км-т хэдэн литр шатахуун зарцуулдаг вэ?

-Хөдөлгүүрийн хувьд 1.8, 1.7 гэсэн хоёр сонголттой. 1.8 хөдөлгүүр нь Vesta загвар, 1.7 хөдөлгүүр 4х4 загвар дээр суурилуулагдсан байгаа. Үйлдвэрээс өгч буй стандартаар 100 км-т 10 литр шатахуун зарцуулна. Гэхдээ манай улсын шатахууны чанар, цаг агаарын онцлог, жолоочийн ур чадвар зэргээс хамаарч наашаа, цаашаа хэлбэлзэх байх.

ГЭРЭЛ ЗУРГИЙГ Г.БАЗАРРАГЧАА