Монгол Улсын Үндсэн хуулийн Цэцийн дарга Д.Одбаяр болон түүнийг дагалдан явсан А нар аравдугаар сарын 31-нд Улаанбаатараас Сөүлийн чиглэлийн онгоцоор зорчиж явахдаа үйлчлэгч бүсгүйн биед гар хүрч “бэлгийн халдлага” үйлдсэн гэх үндэслэлээр цагдаад баригдсан тухай шуугьж байна. Эдүгээ 52 настай эрхэм Цэцийн даргын чухам юуны учир үйлчлэгч бүсгүйн биед хүрч, шалгагдах болсон тодорхой биш байгаа ч Монгол Улсын нэр хүндийг гутаалаа гэх хүмүүс ч байна. Төрийн өндөр албаны хүн байж аян замд ч зүгээр явчихаж чадахгүй хаашаа ч янзын түшмэдтэй болчихсон улс вэ дээ, Монгол минь.

УИХ-ын гишүүн хүн хүчирхийлэл үйлдээд, сэтгүүлчийн асуултад бүдэрснээр дотоожоор овоглох болсон явдлын шүүх хурал болж амжаагүй байхад нас намба тогтсон төрийн өндөр албан тушаалтан эрхэм ийм хэрэгт хутгалдаж буй нь мөн ч ёс зүйгүй яьдал мөн өө дөө. Бас нэг улстөрч эрхэм ч бэлэг эрхтнийхээ зургийг бүсгүй хүн рүү утасны зурвасаар илгээсэн нь түмний шившиг болсоор байтал улс орны хил дамнан дур хүслийн цалмаа шидэж явах нь даанч дээ гэмээр үйлдэл болж гэхээс яахав. Ноён Одбаярыг олон улсын Венийн хэлэлцээрийн дагуу түр сулласан гэж байгаа. Улсынхаа нэрийг шороотой хутгасан түүнийг тухайн улсын хуулийн байгууллагаас дахин хэрэгт татаж байцаах нь тодорхой. Бүхэл бүтэн бүгд найрамдах улсын эцэг хуулийн дарга хүн бус улсын хуулийн дор бөхийнө гэдэг Монгол Улсыг саарал жагсаалтад орсон дээр саар муу нэртэй болгож хөөдөж байгаа гэхэд хилсдэхгүй. .

Д.Одбаяр 20 орчим насны үйлчлэгч бүсгүйн биед нь гар хүрч, дагалдан явсан 42 настай нь нөгөө үйлчлэгч бүсгүйн мөрөн дээр гараа тавих зэргээр “бэлгийн халдлага” хийсэн гэж одоогоор мэдэгдээд буй. Дуудлагыг хүлээн авсан цагдаа нар онгоц буухыг хүлээж байгаад тэднийг баривчилж. Солонгос дахь Монгол Улсын Элчин сайдын яамнаас холбогдох хүмүүс очиж, Үндсэн хуулийн Цэцийн даргыг суллуулж авч. Д.Одбаяр өчигдөр 17.00 цагт Улаанбаатар-Сөүлийн чиглэлийн нислэгээр Индонез улсад болох Олон улсын Цэцийн гишүүдийн хуралд оролцохоор БНСУ-гаар дамжин зорчиж явахдаа энэ хэрэгт холбогдсон гэдгийг баттай эх сурвалж мэдээлж байгаа. Одбаярын түр суллагдах болсон Венийн хэлэлцээр гэдэг нь 1961 оны дөрөвдүгээр сарын 18-нд Австрийн Вена хотод батлагдсан хэлэлцээр бөгөөд гадаад харилцааны ажилтан нь эрүү болон иргэний, захиргааны шүүхийн мэдүүлэг, гэрчлэлээс чөлөөлөгдөх зохицуулалттай юм билээ. Үндсэн хуулийн Цэцийн Хэвлэл мэдээллийн албаны ажилтнаас дээрх үйл явц болоод үйлдлийн талаар лавлахад “Тийм зүйл болоогүй. Хамт явсан хүнээс нь тодруулахад үгүйсгэсэн” гэсэн хариу өгсөн. Тухайн ажилтны хувьд хамт яваа ч үгүй болохоор юугаа ч мэдэх билээ. Төрийн өндөр албаны хүн гэхээр тэнгэрт ч садарлаж самуурч болно гэж андуурсан юм биш байгаа