Монгол Улсад 30 хоногийн оршин суух зөвшөөрөлтэй орж ирсэн ч хугацаа хэтрүүлэн, улмаар цахим гэмт хэрэг үйлдэж байсан магадгүй хэмээх үндэслэлээр өнгөрөгч сарын 29-30-нд шилжих шөнө Тагнуулын ерөнхий газар болон Эрүүгийн цагдаагийн албаныхан нийслэлийн гурван дүүрэгт гүйцэтгэх ажиллагаа явуулж, таван зочид буудлаас 800 гаруй хятад иргэнийг саатуулсан.

БНХАУ-ын харьяат эдгээр иргэдийг саатуулсан газруудаас “Iphone-6” загварын 10 мянга гаруй гар утасны сим, өндөр хурдны үзүүлэлттэй 1000 гаруй суурин компьютер хураан авч шалгаж буйгаа ТЕГ, ЦЕГ-ын удирдлагууд албан ёсоор мэдээлсэн. Арваннэгдүгээр сарын 1-нд буюу өчигдөр нийслэлийн Хан-Уул дүүрэг 11дүгээр хорооны нутаг дэвсгэрт байрлах орон сууцнаас 14 хятад иргэнийг мөн саатуулж, хэргийн газраас 40 гаруй зөөврийн компьютер хураан авсан байна. Нэмж саатуулсан 14 иргэнийг өнөөдөр мөн албадан буцаахаар шийдвэр гаргасан аж.

Монгол Улсын нутаг дэвсгэрт хууль бусаар оршин сууж байсан 783 хятад иргэнийг өнөөдөр буюу арваннэгдүгээр сарын 2-ны өдөр албадан буцаах ажлыг хууль хяналтынхан яг одоо зохион байгуулж байна. Эдгээр иргэдийг нутаг буцаах ажиллагаа эхлээд байгаа ба галт тэргээр БНХАУ-руу явуулахаар болсон юм. Эдгээр иргэдийг нутаг буцаах бүх зардлыг Монгол Улсын төсвөөс гаргаж байгаа ба нийт 100 орчим сая төгрөг зарцуулж байгаа аж.

Тодруулбал, гадаадын иргэнийг албадан гаргах журам болон Монгол Улсын Засгийн газрын 339 дүгээр тогтоолын 2.3.7 буюу “Албадан гаргах гадаадын иргэн нь зардлаа өөрөө хариуцах санхүүгийн боломжгүй нь тогтоогдсон тохиолдолд албадан гаргахад шаардагдах зардлыг гадаадын иргэний асуудал эрхэлсэн төрийн захиргааны байгууллагын албадан гаргах ажиллагааны зардлаас гаргуулах” гэсэн заалтын дагуу ийнхүү улсын төсвөөс хөрөнгө зарцуулж байгаа юм байна.