УИХ-ын гишүүн Л.Болд Германд хар тамхины асуудлаар хоригдож буй Баттүшигтэй холбоотой асуудлаар ийн ярилаа. Тэрээр “Монголд хуулиар тоглодог шүү дээ. Бүх дэлхий мэдээд байхад муур, хулгана болоод байдаг даа. Яг тэрэн шиг Монголын энэ бүлэглэл Германд тийм юм хийгээд Монголын нэр хүндийг гутамшиг болгож байгаа байхгүй юу. Шүүгчээс нь татгалзаж үзэж байх шиг, өмгөөлөгчөө сольж үзэж байх шиг. Германы хэвлэлд үүнийг үнэхээр шоолоод байгаа байхгүй юу. Уншихад үнэхээр ноцтой. Тэгээд бүр ичих ч үгүй “Энэ бол Монголын, бүр төрийн хар тамхи байсан юм аа. Төрийн даалгавраар явсан юм аа” гэж Монгол Улсаа доромжлох юм. Хэрвээ төрийнх байсан бол УИХ, Засгийн газар үүрэг өгнө өө дөө. Энэ хар тамхины хэрэг төрийнх биш байхгүй юу. Үүнийг Монгол Улсын төрийн тусгай ажил биш байсан гэдэгт би зуун хувь итгэлтэй байна. Ингэж л Монгол Улсаа гутааж байгаа. Үүний өмнө хүн хулгайлчихаад “Монголын төрийн даалгавраар хулгайлсан” гэж улсаа ийм террорист, хар тамхи зөөгч гэж Монгол Улсын иргэн биш юм шиг, Монгол Улсын төрд тангараг өргөж байгаагүй юм шиг зарчимгүй явдал гаргаж байгаа. Германы хэвлэлийг би байнга уншдаг. Монгол Улсын нэр хүнд маш их хохирч байна. Маш харамсалтай байна. Тэнд өнөөдөр монгол хүнтэй уулзахад маш эвгүй нөхцөл байдал үүсч байна. Энэ асуудлыг яагаад УИХ-ын чуулган, байнгын хороон дээр албан ёсоор ярих ёстой вэ гэхээр Монголын төр нэрээ цэвэрлэх хэрэгтэй байхгүй юу. Хуулийн процесс явдгаараа яваг гэдэг нөхцлийг нь бүрдүүлэхгүй бол өнөөдөр бид тэр хуйвалдаанд оролцож байгаа юм ичингүйрч нуугдаж байгаад чуулганаа тараачихвал дөрөвдүгээр сар хүртэл маш эвгүй байдал үүсэх гээд байгаа байхгүй юу. Тийм учраас шахаж байгаад ирэх долоо хоногийн Байнгын хороогоор хэлэлцэнэ. Тэр үеэр албан ёсны байгууллагуудаас албан ёсны мэдээлэл авч олон түмэнд түгээнэ. Тэгэхгүй бол Монгол Улс маань гэмт хэрэгтэн улс боллоо. Дэлхий дээр тийм гэмт хэрэгтэн улс байна шүү дээ. Одоо жишээ нь, далайн дээрэмчдийг албан ёсоор хамгаалдаг Сомали ч гэдэг юм уу, дэлхийн усан онгоцнуудыг дээрэмддэг улс байна. Эсвэл хар тамхи үйлдвэрлэдэг, хуурамч мөнгө түгээдэг аймшигтай гэмт хэрэгтэй улсууд байна. Тэрний эгнээнд Монгол Улсыг оруулах аюул үүсээд байгаа байхгүй юу. Юун саарал жагсаалт вэ? Гэмт хэрэгтэн улс болох бол харин хар жагсаалт шүү. Байнгын хорооны хуралдаанаар энэ асуудлыг авч хэлэлцэх ёстой” гэсэн юм.