УИХ-ын чуулганы баасан гаригийн ээлжит хуралдаанаар Монгол Улсын 2021 оны төсвийн тухай болон түүнийг дагалдан батлагдсан хуулиудад бүхэлд нь тавьсан Монгол Улсын Ерөнхийлөгчийн хоригийг хүлээж, авах эсэхийг хэлэлцэж байна. Хэлэлцэж байгаа асуудалтай холбогдуулан гишүүд асуулт асууж, хариулт авч байна.

УИХ-ын гишүүн Ж.Сүхбаатар: Вакцин худалдан авах, хуваарилах хүргэх асуудал тусдаа. Энэ хүмүүнлэгийн зээл. Арилжааны зүйлтэй хольж хутгах шаардлага байхгүй.

Ерөнхийлөгчийн тамгын газрын дарга Ө.Шижир: Ерөнхийлөгч төсөвтэй холбоотой улс төр хийгээгүй. Хориг дээрээ ч маш тодорхой дурдсан. 2021 оны төсөвт байгаа үр ашиггүй хөрөнгө оруулалтаа хуваарилаад эрэмбэлээд, ашигтай байдлаар дарааллуулаад явах нь зөв гэж үзэж байгаа. Ерөнхийлөгч өмнө нь төсөвт тавьж байсан хоригууд нь энэ үед л тавьж байсан. Яагаад гэхээр УИХ-аас төсвийг арваннэгдүгээр сарын 15-нд батлаад Ерөнхийлөгчийн Тамгын газарт ёсчилж ирүүлээд тав хоногийн дотор Ерөнхийлөгч хориг тавьж байгаа. Хориг тавьснаас хойш 14 хоногийн дотор хоригийг УИХ хэлэлцдэг.

УИХ-ын гишүү Х.Булгантуяа: Төсвийн хориг дээр авч хэрэгжүүлж байгаа, хийж байгаа нэлээдгүй ажил байгаа. Цар тахлын хуулиар Засгийн газар хөрөнгө оруулалтаа эрэмблээд эхэлчихсэн юм байна лээ. Цаашдаа нөхцөл байдал хүндрэвэл аль аль хөрөнгө оруулалтаа царцаах вэ гэдгээ шийдсэн. Нийт 897 мянган айл өрх байна. Хүүхдийн мөнгөнд 897 орчим тэрбум төгрөг тавьсан байна. Үүний хажуугаар 243 мянган иргэнд хүнсний талон олгож байна. Бизнесийн салбараа хэрхэн яаж дэмжих вэ гэдгийг судлах ажлын хэсэг гаргаад ажиллаж байна. Төсвийн хөрөнгө оруулалтыг тэр чигт нь зогсооно гэдэг эдийн засагт маш хүнд тусна. Энэ цаг үед дэлхийн улс орнууд ч ирэх оныхоо төсвийг ярьж байна. Ингэхдээ хөрөнгө оруулалтаа дандаа нэмсэн байгаа. Хүнд цаг үед хамгийн том цусны эргэлтээ Засгийн газар өөрөө бий болгох хэрэгтэй. Тэглээ гээд халамж, хамгааллыг бууруулна гэсэн үг биш. Төсвийн тодотгол хийх хэрэгцээ шаардлага гарвал Засгийн газар бэлэн байгаагаа хэлсэн. Эрүүл мэндийн салбарын хөрөнгө оруулалт өмнөх жилийнхээс хагас их наядаар нэмэгдсэн.

Төсвийн байнгын хорооны дарга Б.Жавхлан: ДЭМБ-аас зөвшөөрсөн вакцинуудаас заавал үнэтэйг нь хөөцөлдөөд байх шаардлага байхгүй. Дэлхийн банкнаас зээл авч байгаа нь хөнгөлөлттэй үнээр авах боломж олдож байгаа. Үүнийг Дэлхийн банкнаас ч зарлаж байгаа. AstraZeneca-аас гаргах вакциныг 7 ам.долларт багтаагаад хоёр тунг авна. Бид энэ хөтөлбөрт хамрагдснаар хөнгөлөлттэй үнээр авна. Мөн хүн амынхаа 20 хувьд үнэ төлбөргүй авна. 40-60 хувьд нь хөнгөллтэй үнээр авна.

УИХ-ын гишүүн С.Ганбаатар: Энэ хоригийг хүлээж аваасай гэж бодож байна. УИХ төсвийг баталдаг тодорхой ашиг сонирхолтой. Засгийн газар хэрэгжүүлдэг бас л тодорхой ашиг сонирхолтой. Ерөнхийлөгч улс төржүүлээд байна гэж яриад байна. Ерөнхийлөгч төсөв баталдаггүй, төсөв хэрэгжүүлдэггүй учраас болохгүй байгааг хэлдэг. 300 хөрөнгө оруулалтыг хойшлуулаад хувийн хэвшлээ мөнгөжүүлэх ажил байгаа. Хүмүүсийн зовлонгоор битгий улс төр хийгээч ээ гээд байдаг. Хүмүүсийн зовлонг хэрхэн шийдэх вэ гэдэг гарц гаргалгааг яриад байна. Дайны үе гэж яриад байгаа. Дайны үед түрээс, цахилгааны мөнгө төлөх гээд явдаггүй. Үүнийг Засгийн газар хариуцдаг.

Ерөнхийлөгчийн тамгын газрын дарга Ө.Шижир: Улсын төсөвт хориг тавих, өвчин цар тахлын байдлаар улс төр хийх ёс зүйгүй хүн Ерөнхийлөгч биш. Сүүлийн гурав, дөрвөн жил 42 сая тонн нүүрс гаргана гэсэндээ хүрээгүй л юм байналээ ш дээ. Хүрээгүй учраас улсын төсвийн орлого тасалдаж л таараа. 2020 оны арваннэгдүгээр сарын 17-нд Ерөнхийлөгч Засгийн газарт өрх бүрээ дэмжих нэг сая төгрөгийн урамшуулал олгох хөтөлбөрийг танилцуулсан. 18-нд татгалзсан хариу авсан. Түүний дараа Ерөнхийлөгч Сангийн сайдтай уулзаж танилцуулга хийсэн.