УИХ-ын гишүүн Н.Алтанхуяг АТГ-т яллагдагчаар татагдаж, мэдүүлэг өглөө. Мэдүүлэг өгснийхөө дараа тэрээр сэтгүүлчдэд хандан: " Би өнөөдөр мэдүүлгээ өгсөнгүй. Яллагдагчаар татах прокурорын санал ирсэн, танилц гэсэн. 10 гаруй хуудас материалтай богинохон хугацаанд танилцах хэцүү юм байна. Өмгөөлөгч аваад хэд хоногоос ирж танилцая гэж хэллээ.

Хөгжлийн банктай холбоотой асуудлаар урьдчилаад намайг гэм буруутан болгочих гээд янз бүрийн зүйл яригдаад байсан. Гэхдээ өнөөдрийнх Хөгжлийн банктай шууд холбоотой биш юм шиг байна. Манай засгийн газрын үед гарч байсан шийдвэртэй холбоотойгоор яллагдагчаар татах санал ирүүлсэн юм байна.

2014 онд огцруулснаас хойш хууль хяналтын байгууллагын хаалга татуулж, яллагдагч хүртэл явуулсан. Тэгээд Ц.Элбэгдоржийн тавиулууд алга болж, солигдоод 2020 оны эхээр хэрэгсэхгүй болгох нь зүйтэй юм байна гэсэн. Өнөөдөр юу болоод байгааг сайн мэдэхгүй байна. 2020 онд УИХ-ын гишүүн болсноос хойш улс орны ирээдүй, ард түмний амьдралд санаа зовж нэлээн юм ярьсан даа. Их олон хүн дургүй нь хүрсэн. Ялангуяа эрх баригч намын гишүүд Н.Алтанхуягыг буруутан болгох зохиол бичиж байгаа гэсэн. Ямар зохиол бичсэнийг нь мэдэхгүй. Үнэн мөн нь тодрох байх.

Зохиол нь цаашаа яаж бичигдсэнийг мэдэхгүй. Ер нь зохиолгүй юм байдаггүй л дээ. Намайг шударга бусын хонгил гэж ярьж байхад ийм байдаггүй гээд үгүйсгэдэг байсан. Гэтэл үүнийг яриад хоёр Ерөнхийлөгч гарсан. Бүрэн эрхээс түдгэлзэх эсэх нь тэр хүнээсээ хамаардаггүй. УИХ дээр орж санал хураагаад шийддэг. МАН мэдээж 60 гаруй хүн байгаа учир тэд нар шийдээд л явна. МАН-ынхан кнопдоод л өгчихдөг шүү дээ. " гэв.

Эх сурвалж: www.sonin.mn