ЦЕГ-ын Эрүүгийн цагдаагийн албанаас “Наадмын тасалбарыг шаглаж 400 мянган төгрөгөөр зарна” хэмээн сошиалд бичсэн иргэдийг шалгаж эхэлсэн бөгөөд сэжигтэй бүлэг этгээдийг шуурхай илрүүлэн нийт 215 ширхэг тасалбарыг хураан авчээ.

Сэжигтэй нэр бүхий иргэдээс хураан авсан тасалбарыг худалдан авахад ашигласан гар утасны дугаар зэрэг мэдээллийг шалгахад өөрсдийн гэр бүл, хамаатан садан, найз нөхдийн утасны дугаарыг ашиглаж, их хэмжээгээр тасалбар худалдан авч санаатайгаар хомсдолд оруулсан нь ХУУЛ БУС ҮЙЛДЭЛ болох нь тогтоогджээ.

Эх сурвалжийн мэдээлснээр, шалгалтаар сэжигтэй этгээд Н.Б нь цахим орчинд хуурамч хаягнаас “Наадмын нээлт, бөхийн барилдааныг үзэх тасалбарыг 180 мянган төгрөгөөр худалдан борлуулж байна” гэсэн мэдээллийг байршуулан тасалбарыг худалдан борлуулахдаа иргэн Ч.Ү ашиглаж, түүнд бусдын эзэмшилд байх утасны дугаарыг ашиглуулан тасалбар худалдан борлуулсан байжээ.

Тодруулбал, иргэн Н.Б нь Enaadam.mn цахим сайтаас анх 160 ширхэг тасалбарыг авснаас 5 ширхэгийг нэг бүрийн үнэ 140 мянган төгрөгөөр худалдаж, үлдэгдэл 155 ширхэг тасалбарыг "худалдан борлуулах гэж" байсныг түүний эзэмшлийн Тоёота акуа маркийн тээврийн хэрэгслээс хураан авчээ.

Мөн “наадмын тасалбарыг шаглаж зарсан” гэх сэжигтэй этгээд Б.У цахим орчинд хуурамч хаягнаас “Наадмын нээлт, бөхийн барилдааныг үзэх тасалбарыг 400 мянган төгрөгөөр худалдан борлуулж байна” гэсэн мэдээллийг байршуулсан бөгөөд сэжигтэй этгээдийг шуурхай илрүүлэн нийт наадмын 60 ширхэг тасалбар байсныг тус тус хураан авчээ.

Ташрамд дурдахад, Үндэсний их баяр наадам зохион байгуулах хорооны захиалгаар “Коди” ХХК-иас Enaadam.mn цахим сайтыг хөгжүүлж, иргэдэд тасалбарыг энэ оны 07-р сарын 01-02-ны өдрүүдэд буюу 2 өдөр онлайнаар 7680 ширхэг багц тасалбарыг 376 сая төгрөгөөр худалдсан бөгөөд баяр наадмын үзэх тасалбарын үнэ нэг багц тасалбар 42,500, 52,000 төгрөгөөр зарагджээ.