12 сарын 04-нөөс эхэлсэн жагсаал хоёр дахь өдрөө шөнө дүл өнгөртөл үргэлжиллээ. Иргэдийн жагсаал цуглаан хийх, үзэл бодлоо илэрхийлэх эрхэнд халдахаас урьтан хүлээцтэй байдал үд хэвийж нар жаргатал үргэлжилсэн ч жагсаал бүрий өнгөрөхтэй зэрэгцэн хурц хэлбэрт шилжиж үймээн самуун дэгдэж болзошгүй нөхцөл байдал үүсч УИХ шуурхай хуралдаж онц байдал зарлах эсэхийг хэлэлцсэн ч Ерөнхийлөгч онц байдал зарлах шаардлага үүсээгүй байна гэж үзжээ.

Харин өдөр төрийн ордон дотроос мэдээлэл хийсэн 3 удаагийн 5 улсын их хурлын гишүүн, сайд нарын мэдэгдэлд “нүүрсний хулгайчдын нэрийг ил зарлах, тэдэнд хариуцлага тооцохыг шаардах иргэдийн байр суурьтай нэгдмэл байааг онцолсон юм”. Гэхдээ ЗГХЭГ-ын дарга Д. Амарбаясгалан тэргүүтэй эрх баригч намын төлөөлөл албан мэдэгдэл хийхдээ өнгөц, сул нөгөө л нэг иргэдийн дургүйцэл төрүүлэхүйц хэт албан, хүйтэн хөндий хариулт өгсөн нь магадгүй жагсаал цуглааны уур амьсгал хурцадахад хүргэсэн байж болзошгүй.

Харин УИХ-ын гишүүн С. Ганбаатар нүүрсний хулгайчид гэх 3 эрхэмийн нэрийг шууд зарлаад зогсохгүй тэд хууль, шүүхийг дураараа өөрчлөн, хүссэнээрээ шийдвэр гаргадаг хууль шүүхийхэн ч ийм тодорхой хэрэгт хойрго хандаж байгаа зэрэг нь Монголын татварын мөнгөөр ажилладаг төрийн гурван өндөрлөгийг хүртэл нүүрсчид худалдаж авсан байж болзошгүй талаар мэдэгджээ.

“...Хуулийн хүрээнд...” гэх хувь хүний нэр хүндэд халдахгүйг хичээцгээх эрх баригчдын соёлтой дүр төрхийн цаана хулгайчдыг хаацайлсан, эсвэл хаашаа ч хөдлөх аргагүй хүчинд автсан байж магадгүй ч тэрийгээ далдлахыг хүсч, арга ядсандаа ганц нэг хүний нэр, хэд гурван мэргэжилтэн, ТӨҮГ-ын захиралуудын нэр хэлээд авна лээ. Үүнийг ажигласан гавж Д. Нямсамбуу:

Манай эрх баригчид үргэлж л ямар нэг том дайсантай тэмцэлдэж ирсэн байдаг даа. Бүх эрх мэдэл нь байсаар байтал огт ялдаггүй, бас хэн нь тодорхойгүй, болдоггүй нэг тийм “бүлэглэл” гэсэн үгтэй. Эцэст нь гар хөлийн үзүүрт зарагдаж байсан хэдэн хүнээр туг тахидаг. Гэжээ.

Зарим хэвлэл мэдээллийнхэн, нийгмийн сүлжээний идэвхтэнүүд ч олон нийтийн үзэл бодлоо илэрхийлж буй хэлбэрийг “...худалдагдсан, энд тэндээс захиалсан, жүжиг...” гэх мэтчлэн албаар ч юм шиг гутаах, дорд үзэх хандлага илэрхийлсэн нь харьцангуй хурдан мэдээлэл тархадаг, нийгмийн эрүүл чөлөөт хэсгийн бухимдалд зарим талаараа гал нэмчихсэн үү гэх байр суурь ч ажиглагдаж байлаа.

Мөн олон нийтийн татвараар санхүүждэг МҮОНТ-ийг болон телевизүүдийг эрх баригчдын даалгаваар ажилладаг, олон нийтэд мэдээллийг ил тод, шуурхай, тэнцвэртэй хүргэх хуулиар хүлээсэн үүрэгээ умартсан... шүүмжлэх иргэд олон байв. Мөн залуусын сэтгэл зүрхний тэмцлийг харлуулах хүн олон байгаад дургүйцсэн хүмүүс ч цөөнгүй.

Жишээ нь сэтгүүлч Б.Ганчимэг:

Эсэргүүцлийн жагсаалд нэг хэсэг залуус нь ( нэг хэсэг нь шүү) ирээдүйнхээ төлөө хүсэл мөрөөдөл, хүрэн зүрх хоёроо тэвэрч ирээд тэсэрч байна, тэмцэж байна. Тэдэнд өөр юу ч байхгүй.

Харин нөгөө талд нь гэнэ сэрэггүй тэр сайхан залуус тооцоолшгүй эрсдэл рүү юугаа ч мэдэхгүй дайраад орж байхад “ Хөөе, ах дүүс минь наад сэтгэл зүрхний дуудлагын чинь органик халуун амьсгаан дээр завшигчид, турхирагчид, эрлийз хурлийзууд, цөөврүүд улс төрийн ашиг хонжоо хайгчид сарьчих гээд байна шүү гээд анхааруулчих ч сэтгэлгүй агаа нар гэртээ буйдан дээрээ тухлаад шинэхэн ирсэн идшээ огтолсон шиг ээ тамшаалдаж суугаа даа. Муу новшнууд.., Энэ залуучууд, энэ сайхан залуу нас бол Монголын ирээдүй шүү.

Тиймээс хайрлаарай….