Нүүрсний хулгайн хэрэгээс үүдэн нийгмийн уур амьсгал бухимдалд автаж, төрөөс хулгайчдын нэрсийг шууд илээр зарлан, нэн даруй хариуцлага тооцохыг шаардаж байгаа үед эрх баригч намын бүлгийн дарга хариуцлагагүй гэмээр хэт улс төржсөн мэдэгдэл хийж гал дээр тос нэмчих шиг боллоо.

12 сарын 06-ны өдөр төрийн ордонд АН-ын бүлэгээс мэдээлэл хийхдээ УИХ-ын гишүүдийн 50 хувь нь худлаа хэлж, хулгай хийсэн байна гэх мэдээлэл тусгай албадад байгаа... Нүүрсний хулгайд МАН -ын 62 гишүүнээс 30-40 нь нүүрсний хулгайтай орооцолдсон...гэж мэдэгдсэн бол МАН-ын дарга Тогтохсүрэн: Нүүрсний хулгайтай манай намын нэг ч гишүүн холбоогүй... гэж тас гүрийлээ. Иймээс дараах дүгнэлтийг хийхэд хүргэж болзошгүй.

1. Үнэхээр ардчилсан намын бүлэгээс мэдэгдсэн 30-40 УИХ-ын гишүүн нүүрс хулгайлахад оролцсон юм бол эрх баригчид энэ асуудлыг түрүүчийн дуулиант авлигын хэргүүд шиг хав дараад өнгөрөөх бололтой. Гэхдээ энэ хэрэг дэндүү их мөнгөн дүн яригдсан, үндэсний аюулгүй байдалд ноцтой харшлах, эдийн засгийг эрс хохироосон асуудал яригдаж буй тул ард түмэн хариуцлага тооцохыг хатуу шаардаж байгааг 3 өдрийн жагсаалаас харж болохоор байна.
2. Эрх баригч нам үнэхээр сүүлийн 30 гаруй жилд төрд засаглахдаа нэг ч авлигалч, албан тушаалын гэмт хэрэгтэн төрүүлээгүй ариун цагаан нам юм бол яагаад монгол улсын авлигын индекс жил ирэх тутам буурч, авлигаас үүдсэн ядуурал, ажилгүйдэл, эдийн засгийн хямрал нүүрлэсээр байгаа вэ?
3. Зарим хүмүүсийн үзэж буйгаар Тогтохсүрэн даргыг ийнхүү хэт улс төржсөн, явцуу, хийрхүү үг хэлэх хүртэл МАН-ыг сайнтай муутай ч улс төрийн бие даасан институд гэж харж байлаа. Харин ийм нунж дорой, ухамсаргүй байдал гаргаж “ бүгдэд бид биш тэд л буруутай” гэдэг хачин хандлагатайд нь итгэл алдарч нэгэнт төр түших эрх зүйн суурь чадамжгүй хоцрогдсон, авлига, албан тушаалд дуртай улс төрчдийн цугларал төдий болжээ... гэж үзэхээр... гэсэн байна.
4. Ямар ч асуудалд улс төрчийн мэдрэмж гэж байдаг. Нийгмийн бухимдал дээд цэгтээ хүрсэн ийм үед төрийн эрх үнэмлэхүй олонхоор эзэгнэж суугаа эрх баригч намын бүлгийн дарга нь “манай намаас лав хулгайч байхгүй шүү та нар өөрсдөө учраа олоорой” гэх шиг хүйтэн хөндий хайхрамжгүй, аархсан үг хэлчихсэн нь “ардын нам хулгайлаагүй юм бол ард түмэн ядуураагүй л юм байна л даа” гэх гунигтай гэхдээ инээдэмтэй ойлголтыг төрүүлж байгаа юм.
5. Үндсэн хуулийн нэг гол зарчим бол ард түмний мэдэх эрх. Үүнийг л хангаж өгөхийг олон хүн шаардаж байгаа. Дараа нь хариуцлага тооцох, хуулийн зарчим шударга үйлчлэх зэргийг төр иргэн хамтраад хийж болох энгийн асуудал. Монголд мөнгөтэй, эрх мэдэлтэй нь гэмт хэргийн ард хаацайлуулж золиосонд нь түрийвч нимгэн, төрд нөлөөгүй хэн нэгэн хэд гуравхан хүн золиослогдоод дуусдаг чөтгөрийн тойрог хэдий бол үргэлжлэх вэ?