Баас хатавч өмхийгөө тавихгүй гэдэг шиг өнгөрсөн гучин жилийн хугацаанд хэд хэдэн банк дампууруулж, хэний ч төсөөлөмгүй олон тэрбумын хулгай хийж оффшорт хавч дарчхаад эргээд тэр мөнгөөрөө төр засгийн эрх мэдэлд сууж, сонгуулиас эхлээд худалдаж авч болох бүхнийг хуу хаман өөрсдийн талд ажиллуулах санаархал бүхий эрх баригч нам нүүрсний хулгайн хэрэгт намынхнаа нууцлаад хариуцлагаас мулталж өнгөрөөнө гэвэл дэндүү өрөөсгөл. Харин МАН-д ганцаас бусад нь эрийн шийргүй, эх орноо гэх сэтгэлийн өөдөс ч үгүй бололтой. Н. Номтойбаяр шиг өөрөө хүсэлтээ өгч шалгуулаад үүрэх ялаа үүрээд гараад ирэх цөстэй нь үгүй бололтой.

МАН-ын бүлэг хуралдаад Д.Тогтохсүрэн даргаа манай намаас ямар ч нүүрсчин байхгүй шүү гэж хэлээрэй... гэж шахсан уу ямартай Тогтохсүрэн дарга намынхнаа тас өмөөрч удалгүй ...бас хулгайч байхыг ч үгүйсгэхгүй... хэмээн хэлсэн үгнээсээ буцаж шившигтэй хутгалдаж байна.

Монгол Ардын Нам төрийн эрхийг 20 гаруй жил атгасан зангаргаа бодсон ч дараагийн сонгуулиа бодсон ч ер нь улс төрийн институд гэх статусаа хадгалж үлдэхийг хүсч л байгаа бол нүүрсний хулгайч улс төрчдөө ил зарлаад өг. Энэ бол зүгээр нэг улс төржил биш. Тусгаар тогтнол аюулгүй байдалтай холбоотой асуудал болж ужигирч мэднэ. Ийм үед засгийн эрх баригч нам ийм арчаагүй, ялгадсан дээрээ халтирсан байдалтай байвал хямралд нуруугаа холгуулж хоног өдрийг арай ядан барах ард түмнийхээ өмнө хүлээсэн наад захын үүргээ ч умартсан хэрэг болох юм. Нүүрсний хулгайч нараа зарлавал нүгэл чинь нимгэрнэ гэж олон түмэн та бүхнээс шаардаж байна.