Ардчилсан намаас өнөөдөр /2022.12.14/ хэвлэлийн хурал хийж дараагийн нүүрсний хулгайчдын нэрсийг зарлалаа. Хэвлэлийн хурал АН-ын дэд дарга Ш.Түвдэндорж, Б.Ган-Очир, АН-ын Ерөнхий нарийн бичгийн дарга И.Мөнхжаргал нар оролцож, мэдээлэл өгөв. Мөн Ардчилсан намын улс төрийн зөвлөлөөс нүүрсний хулгайтай тэмцэх ажлын хэсгийг байгуулж, даргаар нь АН-ын дэд дарга Б.Ган-Очирыг томилсон байна. Энэ талаар АН-ын дэд дарга Б.Ган-Очир “Дайны хажуугаар дажин гэгчээр эрх баригчид буруу болгоноо сөрөг хүчин рүү чихэж, зөв болгоноо өөртөө наах гэж байна. Үнэний учгийг олох зорилгоор саналууд дэвшүүлье. Үүний хүрээнд Ерөнхийлөгч У.Хүрэлсүх, УИХ-ын дарга Г.Занданшатарт албан бичгээр шаардлага хүргүүлж байна.

2017-2021 оны ҮАБЗ-ийн хуралдаанаар хэлэлцэж төрийн нууцад хамааруулахаар шийдвэрлэсэн нүүрсний гэрээнүүдийн талаарх тэмдэглэлийг өгөх. ҮАБЗ-ийн зөвлөмжийг гаргахад ҮАБЗ-ийн гурван гишүүн гурвуулаа гарын үсэг зурсан байх учиртай. Гурван хүн суугаад хэлэлцэж байхад тэмдэглэл, протокол нь байх ёстой. Хэн, юу гэж хэлж байсныг бид мэдмээр байна.

ҮАБЗ-ийн зөвлөмжөөр нууцад оруулсан нүүрсний гэрээний эх хувийг үзье. Бүгд дүн шинжилгээ хийе. 2021 онд Ерөнхийлөгчөөр сонгогдсоны дараагаас одоог хүртэлх ҮАБЗ-ийн зөвлөмжөөр байгуулсан гэрээний эх хувийг мөн үзье.

ҮАБЗ ажлаа УИХ-ын өмнө хариуцдаг. Тиймээс хуулийн шаардлагыг хангах бусад мэдээллийг авмаар байна. ҮАБЗ-ийн зөвлөмжөөр оффтейк гэрээ хийгдсэн юм бол Засгийн газар хэрэгжүүлсэн байж таараа. Тэр үед УУХҮ-ийн сайд Д.Сумъяабазар, ХЗДХ-ын сайд Х.Нямбаатар, Сангийн сайд байсан Ч.Хүрэлбаатар юу гэж хэлж, юу хийж байсан бэ. Үүнийг ил болго. Тэгэхгүй бол АН-ын идэж уусан гээд, өөрийнхөө хэдэн гишүүнээр туг тахиад байж болохгүй. Ардчилсан намаас сонгогдсон Ерөнхийлөгч болон АН-аас сонгогдсон гишүүдийг нэрлээд байж болохгүй" гэлээ.

Мөн АН-ын Ерөнхий нарийн бичгийн дарга И.Мөнхжаргал энэ талаар "Нүүрсний хулгайд хамааралтай байж болзошгүй албан тушаалтнууд бол ГЕГ, МХЕГ, АТҮТ, Эрдэнэс Тавантолгой ХК юм. Энэ байгууллагуудын удирдлагыг хэн томилдог вэ. Тэднийг МАН-ын Засгийн газар, Сангийн яам томилно. Энэ хүмүүсийн үйлдсэн хулгайг 2016 оноос хойш ажилгүй байгаа АН-ын гишүүд хийсэн мэтээр хэлж байна. Эсвэл намдаа нөлөөгүй хэдэн хүнээр туг тахилаа. Өчигдөр би та бүхэнд Ч.Хүрэлбаатар, П.Анужин, Сү.Батболд гээд гурван хүн нэрлэсэн. Сү.Батболдын эхнэрийн дүү болох Б.Асралт нь ГЕГ-ын дарга байсан. ГЕГ-ын даргад мэдэгдэхгүй нүүрс хилээр гарна гэж байхгүй. Мөн хоёр гишүүний нэр бидэнд ирсэн.

Нэг нь, УИХ-ын гишүүн, ХНХ-ийн сайд Т.Аюурсайхан. Нөгөө нь, УИХ-ын гишүүн Ж.Мөнхбат. Нүүрсний хулгайнаас гадна нүүрс худалдан авах гэрээ байгуулахад гэрээ бүр дээр нэг тонн нүүрс тутамд 1-2 долларын авлига авч байж байгуулсан гэх мэдээлэл бидэнд ирсэн. Үүнийг АТГ-т шилжүүлж шалгуулна” гэв.

Харин АН-ын ҮБХ-ы гишүүн Ш.Түвдэндорж: "МАН-ынхаан, та нар ард түмний зовлонд цадах болоогүй юу? Та нарын дотоодын зодоон, хулгай, дээрмийн асуудал хэтэрлээ. Ерөнхийлөгч У.Хүрэлсүх хэлсэн байдаг. Хулгайч, дээрэмчин, хүчин хийгч, алуурчин гээд бүх хүн манай намд байна гэж. Хэн нь илүү эрх барьж, хэн нь илүү мөнгө идэх вэ? гэж алалцсан. 12-р сарын 6-нд МАН-ын Бага хурал болох ёстой. 12-р сарын 4-нд санамсаргүй энэ жагсаал эхлээгүй. Хоорондын зодооноосоо болж тэд анх нүүрсний хулгайн асуудлыг анх гаргасан. Ард түмэн шударга бус явдлыг эсэргүүцэж байсан учраас дэмжиж, жагсан улмаар МАН-ынхан хянаж чадахаа больж, бүх нийтийн тэмцэл болж хувирсан. Та нарын хэрүүл, зодоон арай дэндэж байна " хэмээсэн юм.