Ардчиллын баатар гэгдэж явсан Эрдэнийн Бат-Үүл гуай сүүлийн үед эрх баригч намын удирдагчдад ихээхэн тал засаж харин журмын нөхдөө хатуу үгээр дайрч давших болов.

Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхээс 2021 оны 12 сарын 16-ны өдөр Хотын дарга асан Э.Бат-Үүлд дөрвөн жилийн хорих ял оноосон билээ. Түүнийг эрх мэдэл, албан тушаалын байдлаа ашиглаж бусдад давуу эрх олгосон гэм буруутайд тооцсон юм.

2022 оны 04 сарын 04-нд Давж заалдах шатны шүүхээс Э. Бат-Үүл, Б. Чулуудай нарт холбогдох хэргийн таслан сэргийлэх арга хэмжээг өөрчилж батлан даалтад гаргасан юм.

2022 оны 4 сарын 14-нд Э. Бат-Үүл мэдэгдэл хийж ...Х. Баттулга Монгол улсыг самрах гэлээ... хэмээсэн юм. Цагдан хоригдоод гарч ирсэнийхээ дараахан ийнхүү мэдэгдэх нь ямар учиртайг хүмүүс янз янзаар тайлбарлаж байлаа. Э. Бат-Үүлийн холбогдсон “Нийслэлийн гэр хорооллыг дахин төлөвлөх” төсөлд өөрийн хүү Чулуудайн компанид давуу байдал олгосон гэх хэрэг нь Х. Баттулга Ерөнхийлөгчийн үед хөөн хэлэлцэх хугацаа нь дууссан байдаг.

Харин Э. Бат-Үүлийг ял сонсоход Х. Баттулга аль хэдийн эрх мэдэлгүй энгийн иргэн болсон байв. Харин ч Э. Бат-Үүлийг гэнэт цагдан хоригдсонд Ардчилсан намынхан дургүйцэж, эрх баригчдад шударга ёсыг сануулж ч байлаа.

2022 оны 12 сар Хотын дарга асан Э. Бат-Үүл Х. Баттулгыг нүүрсний хэрэгт зарлагдсанаас хойш ч түүнийг буруутгасан жиргээг цахим орчинд цацсаар байв. Үүн дээр нэмэгдэн 19-ний өдөр ЭЗХ-ийн сайд Ч. Хүрэлбаатар, ХҮН-ын УИХ-ын гишүүн Т. Доржханд нар нэмэгдэн “Х. Баттулга зугтчихлаа шүү дээ... бариачээ...” гэх агуулгатай мэдэгдэл хийв.

Ч. Хүрэлбаатар сайдыг олон нийтийн зүгээс “Хотгор шанага”-тай холбоотой асуудлаа шалгуулчхаад нүүрсний хэргийг шалгах шаардлага тавьж байгаа ч тэрвээр үүнийг ор үндэсгүй хэмээн зүтгэсээр байгаа билээ. Харин Т. Доржханд гишүүний хувьд Х. Баттулгатай хувийн өстэй юм болов уу? гэж хардахад хүргэмээр олон байр суурь илэрхийлээд байгаа билээ. Тэрвээр анхнаасаа “40 их наяд” гэх тоог гаргаж шуугиан дэгдээсэн. Гэтэл яг 40 их наяд төгрөгийн нүүрс алдагдсан эсэхийг эцэслэн тогтоогоогүй ба 12 сарын 13-ны өдөр ЗГХЭГ-ын дарга Ц. Амарбаясгалан энэ тоог батлагдаагүй гэсэн.

Харин Хууль Зүй Дотоод Хэргийн сайд Х. Нямбаатар 12 сарын 10-нд МҮОНТ-ийн хэлэлцүүлэгт оролцохдоо Т. Доржханд гишүүний амыг дагуулан “Доржханд гишүүн бараг л зарлачихлаа... Х. Баттулга нүүрсний хулгайтай холбоотой шүү дээ...” гэчихсэн нь хуулийн салбарын хүний алдаа гэгдсэн юм. Учир нь хүнийг хууль шүүхээр гэм буруутай нь эцэслэн тогтоогдоогүй хүний нэрийг гэмт хэрэгт холбогдуулан зарлаж болохгүйг өөрийнхөө амаар хэлж байснаа хэдхэн минутын дараа ийнхүү зөрчиж орхисон түүнийг улс төрд “ буурь суух” арай болоогүй байна уу гэцгээхэд хүргэсэн билээ. 2022 оны 12 сарын 19-нд ХЗДХ-ийн сайд Х. Нямбаатар: Х. Баттулга хувийн баталгаа гаргаж, БНСУ-д эмчилгээ хийлгэхээр явсан. Оргон зайлсан зүйлгүй... хэмээв. Х. Нямбаатар сайдын хувьд энэ удаад туйлширсан мэдэгдэл хийхээс татгалзав бололтой.