Парламент нь хууль тогтоох эрх мэдэл эдэлдэг нийгмийн тогтолцоонд Улсын их хурал эрх зүйн чадамжаар үлгэр жишээ болох ёстой. Гэтэл Монголд сүүлийн жилүүдэд энэ ойлголт жил ирэх тусам улам бүдгэрсээр. “Их хурал”-ын гишүүдээс авлигын хэрэгт шууд болон шууд бусаар нэр холбогдоогүй хүн бараг байхгүй болсон нь даанч эмгэнэлтэй. Улс орны аюулгүй байдалтай холбоотой өнөөгийнх шиг нөхцөл байдалд УИХ аль хэдийн дүгнэлт өгч, гарц гаргалгаа олж, хариуцлагын хэв шинжийг шударга мөрдүүлэх дээр бага ард түмний үүргийг маш сайн гүйцэтгэж байх ёстой.

Гэвч чуулганы танхим бүхэлдээ хэн нь хэнээс илүү ухаантай вэ? Гэсэн уралдаан зарласан юм шиг гишүүд хоорондоо цэц булаалцахад дийлэнх цаг хугацаа нь үрэгдэж байна уу.

Улсын их хурлын тухай хууль
3.1.Улсын Их Хурлын үндсэн зорилт ард түмний төлөөллийн дээд байгууллагын хувьд ард түмний засаглах эрхийг хангахад оршино.

Энэ хууль, зүйл заалтад ард түмэн улсын их хуралаар дамжуулан засаглах эрхтэйг заасан байна. Ард түмний хүсч шаардсаар байгаа хамгийн чухал шаардлагыг ч энэ зүйл заалтад тусгасан байна. Парламент нүүрсний хулгайч нараа ил тод, шударга, ардчиллын зарчимд нийцүүлэн илрүүлж, шийдвэрлэж ажиллахыг Улсын их хуралаас тодорхой шаардсаар байна.

Гэтэл парламент энэ тал дээр ганц нэг хуулийн заалт өөрчилсөн болоод арга саам хийж өнгөрүүлэх байдлаар хандах шиг. Тодорхой асуудалд дүгнэлт, шийдвэр гаргах эрх Улсын их хуралд хангалттай бий.

Үндсэн хуулийн өөрчлөлтийг эрх баригч намд улс төрийн зорилгоор ашиглах эрхийг гайхалтай хурдтай нээж өгдөг УИХ ард түмний шударга ёс нэхсэн олон өдрийн жагсаал цуглаан, байнгын шаардлагад дорвитой аж хэрэгчээр хандах цаг болжээ.