Үнэгүй хоолтой, жижиг гуанзанд ээлжлэн эрхээ эдлэж хоолондоо орж байгаа юм шиг МАН-ын гишүүд дараалан сайдын суудалд заларч байна. Төрийн сайдын сэнтий үндсэндээ тосны алчуур шиг хуучирсан халтар хэрэглүүр мэт үнэлэгдэх цаг ирэв. Улс төрчдийн явцуу шунал дийлдэхээ болиод ирэхээр ийнхүү төрт ёс гишгэгдэн түмний зовлон улам ихдэв. Яамны сайд нэмэгдээд л ямбатай дарга нарын улс төсвөөс зулгаах аян үргэлжилж байхад ард түмний амьдрал өөд нар үзэх золгүй болчих шиг. Гэмт хэрэгтнүүд Засгийн газар, Ерөнхий сайдын суудлаас өөрсдийгөө оосорлон унавал хамт, үхвэл ч хамт гэх шиг давхар давхар сайдын албанд хүртэл заларч задарлаа.

Монголын түүхэнд зарим нь улсын эрхийг булаацалдаад, хатавчныхан хаадын суудалд санаархаж төр самуурсан олон тохиолдол бий. Ялангуяа баруун, зүүнээрээ талцсан “бага хаадын үе”-д баруун түмний эрх баригчид улс дотор улс байгуулах эс бөгөөс даварсаар нийт улс гүрнийг захирах шунал нь хэтийдсээр бусдын зөөлөн зууш болох нөхцөл бүрдсэнийг гашуунаар эргэн санах цаг ирсэн ч юм шиг.

УИХ-ын гишүүн бүр төрийн албыг шантаажны хэрэгсэл болгож ашиглаад зогсохгүй сайдын суудлын шат, гишгүүр төдий болгосоор байвал нийгмийн эмх замбараагүй байдалд даллан дуудсан хэрэг болно гэдгийг хаа хаанаа ойлгоцоохгүй бололтой. Хэрвээ энэ байдлаараа удвал улс төрийн муу муухайд автсан УИХ гишүүдээ ч зохион байгуулах, удирдах чадамжгүй болж тэд Засгийн газрыг “бэлгэвч” болгон ашиглах хүсэлдээ улайрцгаах бололтой.