Яруу алдарт 100 жилийн түүхт МАХН-ын үргэлжлэл нэрээ сольж зүсээ хувилгасан ч мөн чанараа гээгээгүй дарангуйлагчдын үргэлжлэл эрх баригч МАН-ын баяр бахдал, үнсэлт үнгэлт биенээ долоосон өмхий шүлсний дор ард түмэн тарчилж, элэг дөрвөөрөө мөлхөж байснаа өдгөө амаараа шороо үмхэхдээ туллаа. Шинэ жилийн баяраар хир даг болсон памперснаас өөр биедээ хувцасгүй бяцхан үрсийн нүд халтирам зураг олон нийтийн сүлжээнд тархаж түмэн хүний зүрх шимширсэн юм. Гэтэл хамгийн инээдтэй нь эрх баригч МАН-тай хаалтын гэрээтэй гэх телевизүүд энэ тухай нэг ч мэдээлэл гаргалгүй нүдэн балай чихэн дүлий өнгөрөөж дүлийдээ найдаж унгарган гэгчээр элдэв шоу нэвтрүүлж, урлаг соёлын улиг болсон дуу шуугианаар бялбадав.

Гэтэл үнэндээ эрх баригч нам хөшигний ард сөрөг хүчнээ амжилттай хуваан доройтуулсан баяр бахдалдаа автацгаан оны дараа шинэ сайд нар нэмэн хоорондоо уруул тагнайгаар озолцох шахан үнсэлцэж, тэврэлдэн Ерөнхий сайд нь хэнийг ч юм сүрдүүлэн айлгаж бах таваа хангацгаах шив.

Нүүрсний хулгай хэрэгт сүүлийн жилүүдэд ааг бяраа багтааж ядах МАН-ынханд л хамаатайг ард түмэн мэдсээр байхад л улны хэмжээнд очсон сөрөг хүчнийхээ гайгүй гэсэн лидер болгоныг түүж, хулгайч нэр хүчээр зүүн сэгэн дээр овоорсон олон өлөн тас шиг шаагилдав. Дарангуйллын хар савар нь хүч дутсан уу гэлтэй барьцаа лавшруулах заль мэх зохиож Үндсэн хуулийг хүчиндэн өөрчлөх замдаа шулуудцгаан зөвшилцөл нэрийн дор хуйвалдааны арга хэрэгсэл сэдэцгээхийг ард түмэн анирдан харсаар л.

Үнийн хөөргөдөл, үндэслэлгүй хөрөнгөжсөн авлигалчдын дэвсэлт, дэлхийн хямрал зэрэгт элдүүр ханаж хэрсүүжсэн ард түмэнд эрх баригчдын энэ давралт чээжинд нь хурсан гашуун, өмхий шарталтын дараах гулгидас шиг амтагдаж байгаа болов уу.