"АРДЧИЛАЛ, АВЛИГА, ХҮНИЙ ХӨГЖЛИЙН ИНДЕКС ЗЭРЭГ ОЛОН ҮЗҮҮЛЭЛТЭЭР ХОЙНО ЖАГСДАГ УЛСУУДАД СОНГОГЧДЫН САНАЛЫГ ХУДАЛДАЖ АВАХ ҮЙЛ АЖИЛЛАГАА ЭРЧИМТЭЙ ХИЙГДДЭГ"

2020 оны сонгуулиар л гэхэд бэлэн мөнгө тараасан нэр дэвшигч, улс төрийн намын хууль бус үйлдлүүдийн тухай мэдээ сурвалжилга, баримтууд хөвөрсөн ч үүний араас хариуцлага тооцож шийдвэрлэх тохиолдол гарсангүй. Монголд төрийн эрх барих хууль ёсны эрх чөлөөгөө өнөө маргаашийн талхны мөнгөөр сольдог сонгогчдын тоо буурахгүй, бохир улс төрийн технологийг аргыг хүлцэн дагасаар байгаа нь харамсалтай. Манай сонгогчдод “Энэ нэр дэвшигч надад мөнгөө өгч л байг. Мөнгөө тарааж л байг. Би мөнгийг нь авчихаад сонголтоо өөрөөр хийнэ” гэх хандлага хамгийн түгээмэл байдаг. Энэ нь улс төрчдийг өөгшүүлэх, санал худалдан авалтыг сонгуулиас сонгуульд даамжруулах зэргээр маш хор хөнөөлтэй.

Өөрөөр хэлбэл, нэр дэвшигчид санал худалдан авалтад зарцуулж буй тэр санхүүжилтийг бий болгохын тулд ямар эх үүсвэрээс мөнгө босгож байна гэдэг чинь өөрөө эргээд асуудал болж байгаа гэсэн үг.

Сонгогчдын алдаа, сонгуулийн эрх зүйн орчин сулаас өндөр түвшний авлигатай холбогддог, төсвийн мөнгийг очих ёстой газруудад хуваарилахгүй өөр зүйлд зарцуулдаг, дундаас нь ашиг хонжоо хайдаг. Ингэхээр тэр улс орон ч хөгжихгүй, ард иргэд нь улам ядуурч, улам боловсролгүй болж, амьдрал нь дорддог.

Сүүлд нь бүр хамгийн үнэ цэнтэй зүйл болох ардчиллын зарчмууд хэрэгжихээ болино, хүний эрх, эрх чөлөө ч байхгүй болох уршигтай. Ардчилал гэдэг ойлголтыг аль хэдийн бүрэн ойлгох болсон ч монголчууд төрөө өөрсдөө байгуулахад ийм хариуцлагагүй хандаж бүх муу муухайн урхаг ганцхан шударга бус сонгуульд дөрөөлөн гарч ирсээр өдгөө дарангуйлал тун ч хүчтэйгээр өндийн босчээ. Бодит амьдралаас харцгаая иргэдийн санал өгөхдөө авахдаа 50 мянга таны түрийвчинд одоо байна уу? гэвэл байхгүй. Харин мөнгө өгч сонгогдсон гишүүд чинь монголын баялгыг тэрбум тэрбумаар хумсалсаар бидний толгой дээр бааж шээж байна. Ийм түшмэд төрүүлсэн ийм ард түмэн хөөрхий!