Тогтолцооны өөрчлөлтийг ярьж буй Ерөнхий сайдыг хүрээлээд бохир асуудалд нэр холбогдсон улс төрчид даналзаж байхад нь ямар ч сайн сайхны тухай ярих боломжгүй. Нийслэлийн утаа тэнгэр газар хоёрыг холбон бүрхээд хар саарал өнгөөр дүнсийхэд монголын улс төрч яах аргагүй авлигалд оосорлуулсан төрийн түшээдтэй учраас ямар ч гэрэл гэгээтэй үзэл суртал тараах гэж оролдоод нэмэргүй хоолой нь сөөж чих нь дүлийрэх юм. Дуулиан шуугиан, эцэс төгсгөлгүй улс төржилтийн цаана жинхэнэ төр ажлаа хийж байж болох ч насаараа хор найруулсан намба суугаагүй ах нар нь Ерөнхий сайдыг Нямбаатар гэх бэрснээс өөр цэрэггүй шалдан ноён болгож мэдэх.

Товчхондоо Л. Оюун-Эрдэнийн Засгийн газар танхимдаа шахааны сайд нар оруулж ирэх үйл явц Үндсэн хуулиа засварлахад хүргэсэн бол өдгөө агентлаг нь шинэчлэгдэж, даам гарсан зарим нь нэг биедээ хоёр сайдын титэм өмсчхөөд жишим ч үгүй сууна. Ийм шударга ёс ярьдаг Ерөнхий сайд байдагтай учир мэдэхүүд бүү хэл олон түмэн ч эвлэрэхгүй л дээ. Иймд нэг гартаа хууль, нөгөө гартаа шударга ёс атгаад төрөө цэвэрлэж чадвал алсын хараа 2050 бүү хэл үеийн үед магтагдах нь дээ.