Ардчилсан намын Үндэсний бодлогын хорооны хурал болж байна. УИХ-ын гишүүн асан Л.Гүндалай уг хуралд оролцох үеэрээ сэтгүүлчдийн асуултанд хариуллаа.

Тэрээр: "Өнөөдрийн ҮБХ-ын хурал бол хоёр талд байгаа бүх ҮБХ-ны гишүүдийн хурал байгаа юм. Энэ хурал бол шийдвэрлэх үүрэгтэй хурал. Ардчилсан амын хагарал бутралыг эвлэрүүлж, нэг тал руу нь шийдэж, өнөөдөр гарах шийдвэр бол хамгийн хүчин төгөлдөр шийдвэр байх болно. Энэ хурлаас гарсан шийдвэр бол хоёр талын даргын хүслээс давсан, хууль ёсны шийдвэр гэж үзэж байна. Энэ хурлаар намын даргаа сонгох журмаа батална.

Дашрамд хэлэхэд би АН-ын даргад өрсөлдөнө. Гэхдээ энэ асуудал өнөөдөр шийдэгдэхгүй. 2 жилийн өмнө АН-ын даргад нэр дэвшээд М.Тулгат гэж залууд ялагдсан. Одоо бодохоор инээд хүрээд байдаг юм. Дараа нь Монгол улсын Ерөнхийлөгчид өрсөлдөх өрсөлдөөнд нэр дэвшээд С.Эрдэнэд бас ялагдсан. Ийм зүйл болсон. Би АН-ын дарга болно гэдэгтээ итгэлтэй байна.

АН-ыг ялалтанд хүргэх, ард түмний итгэлийг авч, Монгол улсын ирээдүйг өөрчилж, ойрын ирээдүйд сайн сайхан болгож, хулгай дээрэм, шударга бусаас салгах лидер хэрэгтэй. Би аль ч фракцид ордоггүй. АН-ыг ядарч явахад нь тэмцэж ялалтанд хүргэж явсан түүхтэй. Өөрийн зам мөрөө харахад би АН-ыг ялалтанд хүргэнэ, АН-ын ялалт монголын ард түмний ялалт байх болно гэдэгт итгэлтэй байна. АН-ын дарга зүгээр хэн нэг хүн байж болохгүй. Ард түмэн өөрийн удирдагчыг хайж байна. Тийм учраас ҮБХ-ны гишүүд намайг дэмжинэ гэдэгт итгэлтэй байна. 2024 онд УИХ-д нэр дэвшинэ. Монголоо өөрчлөхийн тулд нэр дэвшинэ. Хувиа бодсон бол улстөрийн үйл ажиллагаа явуулах шаардлага надад алга. " гэсэн юм.