Үндсэн хуулийг бүдүүлгээр зөрчих, үл тоох хэнэггүй байдал сүүлийн 7 жилд эрх баригчдын хэрээс хэтэрч, өнгөрсөн гучин жилээс цолгорох болсон ч арай ч алаг үрсээ алагчлан үзэж, эцэг эхийнх нь хөрөнгө чинээ, нийгмийн гарал угсаагаар нь ангилах юм гэж зүүдлээгүй явсан түмэн олны итгэл хөсөрдсөн. Мал маллагааны арга барилыг, социализмын суртал ухуулгаар зэвсэглэн хүний нийгэмд хүртэл хэрэглэж байсан бурангуй байдлаа өөрчлөх чадамжгүй юу гэлтэй үхрийг өч төчнөөн тэрбумаар ээмэгжүүлэх шийдвэр гаргадаг шигээ хүүхдүүдийн мөнгийг бүх хүүхдэд эрх тэгш олгох шаардлагатай.

Товчхондоо малд хэрэглэдэг тэвээрэгтэй үгүйгээр нь ангилж заазлах гэж байгаа юм шиг хандлагаа эргэж харна уу л гэж байгаа юм. Хорин нэгдүгээр зуун бол өөрчлөлт, шинэчлэлтийн салхи намжиж төлөвшин тогтох, хувьсалын эрин байлтай.

Гэтэл ирээдүйгээ баян ядуугаар нь ангилж, зарим хүүхдийг 100 мянган төгрөг авахаас өөр аргагүй “улныхан”, зарим хүүхдийг 100 мянган төгрөг хэрэггүй “феодал” гэсэн дэндүү муйхар, мунхаг шийдвэрээ эргэж харахыг ард түмэн сануулсаар байгаа юм. Эрх баригчид ард түмний эсрэг дарангуйллын гараа чангалсаар байвал дэлхий дахин биднээс үргэн, хойд Солонгос шиг болгох вий.

Төрд алдаа засах бүрэн боломж, эрх мэдэл бий. Бүртгэлийн будилаан нэгэнт тодорхой болоод байгаа цагт дахин тооллого, бүртгэл явуулаад ч хамаагүй бодит тооцоогоо үндэслэн хүүхдүүдийг л ялгаварлан гадуурхахгүй байх ухамсар үлдсэн гэж найдахаас.