Сөрөг хүчин гэж юу болохыг сайн ойлгоогүй эрх баригчдад ард түмний ам уралдаг хэлж байгаа ганц өгүүлбэр бол “ эрүүл нийгмийн амин сүнс, эдгэрэхгүй дарангуйлалд автахгүй байхын гол дархлаа нь сөрөг хүчин юм” гэж ил далд мөн ч олон хэллээ. Нийгэм, улс төр, эдийн засгийн байдал ч үүнийг ойлгууллаа. “Парламентыг ардчиллыг төлөвшүүлнэ” хэмээн ам уралдан ярьцгаах мөртлөө сөрөг хүчингүй парламент, шүүмжлэл сонсдоггүй засагтай байхын төлөө улайран улс төржих үзэгдэл сүүлийн жилүүдэд үргэлжилжээ.

Ардчилсан намын хувьд 30 жил доголон хөлтэй, олон таягтай явж ирсэн гор нь нэг л үе дээр ийнхүү тэсэрч ардчиллын нэр хүндийг хамгаалах сөхөөгүй ч болох шахав. Гэвч муутай сайнтай парламентын ардчиллын гол утга учир болсоны хувьд улс орноо дэд бүтэцжүүлж, зах зээлийн эдийн засгийг ойлгуулж, хоёр ардчилсан Ерөнхийлөгчийг угтаж, үдэж, өч төчнөөн улс төрчдийг нэр дээрээ хүмүүжүүлсэн туршлагатай нам болжээ.

Хүмүүнлэг, иргэний ардчилсан үзэл баримтлалыг дэлхий даяараа “хэрэггүй юм” гээд хаяагүй, хөгжүүлэн, бэхжүүлж боловсруулан нийгэм, үндэсний онцлог, ёс суртахууны хэв шинждээ тохируулахаар төлөвшлийн замдаа яваа. Ийм үед “сөрөг хүчин” гэдэг ойлголтыг унших ч хүсэлгүй байх бус ядаж муур хулганыг барьсан хойноо үхүүлэх ч үгүй сэхүүлэх ч үгүй өнхрүүлж тоглодог шиг сэглээд байж болохгүй юм. Монголын улсын бүхэл бүтэн нэг зууны түүхийг эрээчиж чадах МАН улс төрийн зангаргаа харуулж, шударга өрсөлдөх “ЗОРИГ” үлдсэн л бол сөрөг хүчнийхээ бүртгэлээр эрх мэдлээ ашиглан наадаж тоглохоо болих цаг болжээ.