Монголд болох болохгүй, бүтсэн бүтээгүй цахимжилт газар авсаар. Саяхан л автобусны цахим карт уншигчаар автобусны зогсоолуудыг цэгцлээд өгнө гэж, ebarimt апп ашиглан авлигалтай тэмцэх... emongolia аппаар төрийн үйлчилгээг бүрэн цахимжуулах гэх мэтийн олон гоё амлалтууд хөвөрсөн ч үнэндээ төдийлөн бүрэн дүүрэн үр дүнд хүрэхгүй байна. Автобусны цахим төлбөрийн систем бэлэн мөнгөөр төлбөр төлөх байдлыг халж, нийтийн тээврийн эдийн засгийн алдагдлыг нөхөх зорилготой эхэлсэн ч үлгэн салган үргэлжилсээр, иргэд бэлэн мөнгөөр зорчиж, автобусны асуудал ар араасаа хөвөрсөөр л байна. Нийтийн тээврийн тоог нэмэх, түгжрэлийг бууруулах шийдэл араасаа авлига, ашиг сонирхолын асуудал дагуулж чих дэлсээд амжсан.

Харин ebarimt апп НӨАТ-ийн урамшуулал нэртэй ард иргэдийн татвараар сугалаа зохион байгуулдаг болхи хэлбэрээрээ мөнхөрчих шиг. Уг нь нэмэгдсэн өртөгийн албан татвар, түүний урамшуулал гэдэг иргэдийн төрдөө итгэх итгэлийг нэмэгдүүлдэг, татварын тогтолцоог сурталчилдаг чухал ач холбогдолтой ч үүнийг ухаарах сөхөө эрх баригчдад алга.

Эл цахим бүтэлгүйтлийн үргэлжлэл гэлтэй #RFID системд нийт 18 тэрбум төгрөгийг төсөвлөн 13 тэрбумыг зарцуулан түгжрэл бууруулах, зөрчил арилгах ач холбогдолтойг онцолж буй ч шийдлүүдээ тодорхой болгохгүй хэвээр байгаа нь анхнаасаа төлөвлөгдөөгүй, хөрсөн дээрээ буухад хэцүү болчих вий.

Жолооч нарыг бүртгэж, хариуцлагажуулан, зөрчилтэй тээврийн хэрэгсэл эзэмшигчийг торгож, эрхийг нь хасах арга хэрэглэхийн тулд машин бүрт хяналтын чип суулгах уу. Судалгаагүй, амьдралаас тасармал, шийдэлд хүрэмгүй иймэрхүү сэтгэлийн хөдөлгөөн давамгайлсан шийдвэрүүдэд улсын төсвийн хөрөнгийг хэдэн арван тэрбумаар үрэн таран хийх л монголын өнөөгийн их хямралын гол шалтгаануудыг нэг болсон.