Ерөнхий сайдын таван “Ш” ажиллагааны нэг шувуу нэртэй ажиллагаанд олон хүний нэрсийг зарлан Монголд авч ирэхээр болжээ. Тэдний дунд хулгай худал, хүний аминд халдсан гээд олон гэмт хэрэгтнүүд байгаа гэх. Нийгмийг хамгийн ихээр хордуулж буй алдарт авлигалчдын нэр ч дурайх шиг. Харин зарим иргэдийн байр суурийг ажиглавал төр хэзээ ч том хулгайчдыг зарлаж байгаад барьдаг туршлага байгаагүй. Харин барьлаа шүү гэсэн нь зугтаарай гэснээс юуны ялгаатай гэх.

Улс, нийгэмд хор хохирол учруулах гэмт хэрэг өдүүлээд эх орноосоо оргосон этгээдүүд үнэхээр тийм олон хийгээд тэднийг авчирч улсын ёсоор засаглан, хуулийн хүрээнд шийтгэх гэж байгаа бол маш том дэвшил мөн. Харин завсар зайгаар нь том хулгайчдын бүлэглэл эрх баригчидтай өвөр түрүйдээ оролцон ирэх сонгуульд яахаа тохиролцох юм бол зовлонт толхилцоон, тарчлаанд талхилт л үргэлжлэх биз ээ.

Эдийн засгийн үзүүлэлтүүд эерэг шатлал руу бага багаар дэнжигнэж буй хэр нь ядуурал ажилгүйдэл, хөдөлмөрийн мөлжлөгт дарлуулж, дүрвэж, цагаачлах хүслийг мөрөөдөл болгож буй иргэдийн амьдралд гэрэл гэгээ тусах яагаа ч үгүй бололтой. Учир нь дараалсан баяруудын хөлд чирэгдэн дэлгүүрүүдийн өрийн дэвтэр зузаарч, архидалт, хүчирхийлэл, цөхрөлийн тоо өдөр ирэх тусам өссөөр.

Авлигалтай тэмцэх ажлыг ард түмний зовлон зүдгүүрийг мэдэрсэн хүн хийж байж амжилтанд хүрэх буюу улсын язгуур эрх ашгийг нэн түрүүнд эрэмбэлж чадвал хэдэн Ш үсэг байсан ч хамаагүй. Харин улс төрийн холион бантангаас хэтрэхгүй, авлигалчдын хорон санаанаас хэлтрэхгүй бол ямар үсгийг яаж мөр холбон гоёор нэрлээд ч ард түмэн итгэхгүй. Сөрөг хүчний намаа өөрийнхөө ая тухтай байдалд тааруулдаг намаас сайхан зүйл хүсээд итгэл алдарсан ч дарангуйлал тусгаар тогтнолоо алдсанаас өчүүхэн дээр хэмээн гашуунаар ухах уу.