Хөгжлийн банкны нээлттэй сонсгол өнгөрсөн нэгдүгээр сараас хойш явагдлаа. Асар их мөнгөтэй холбогдсон асуудал болохоор ийм сонсголыг нийгэм үнэн голоосоо нэхэж байсан юм. Тиймээс эрх баригч нам хүний өөрийн гэлтгүй Хөгжлийн банкнаас зээл авсан болгоныг дуудаж, ард түмний нүдэн дээр хэн нь хэн бэ гэдгийг ил болгоно гэж ам гарч байв. Хөгжлийн банкнаас шууд санхүүжилт авсан 3.5 их наяд төгрөгийн 77 төсөлтэй холбоотой асуудал сөхөгдсөн. Тэднээс хэвийн бус төлөлттэй 55 зээлдэгч эхний шатны сонсголоор орох ёстой. Ихэнх нь улстөрчид болохоор 300 хүнийг гэрчээр дуудсан гээд л сүрхий том дуугарч билээ.

Гэрчүүдийн дунд өмнө нь төрийн өндөр албан тушаал хашиж байсан цөөнгүй улсын нэрс ч зарлагдсан. Харин энэ өдрүүдэд үргэлжилж байгаа гурав дахь шатны сонсголоор өмнө нь хэвлэлээр огт яригдаж байгаагүй, Хөгжлийн банкны эх үүсвэрээс арилжааны банкуудаар дамжуулан олгосон 2500 зээлийн мэдээллийг олон нийтэд танилцуулна гэж билээ. Үнэн хэрэгтээ ингэж сүртэй нь аргагүй эхэлсэн Хөгжлийн банкны сонсгол нийгэмд үүсээд байсан хүлээлтэд хүрч чадсангүй.

Анхандаа том, том компанийн захирлууд, улстөрчдийг өмнөө авчирч суулгаад амыг нь ухаж, аашилж зандардаг байсан сонсгол ахлагч Б.Энхбаяр гишүүн маань одоо ганцаараа шахам үзэгддэг болов. Төрийн ордонд, бүхэл бүтэн гурван шатны сонсгол дуусах өнгөндөө орж байхад тэрбээр ягштал гозойгоод байж л байна. Хажууд нь Ж.Сүхбаатар, Т.Доржханд, Э.Батшугар нарын гишүүд бараа болсон шиг суух юм.

Сүүлийн сонсголоос харж байхад ордонд байгаа ганц нэг гишүүн гүйж ороод асуугдаж байна. Жишээлбэл, УИХ-ын гишүүн Ш.Адьшаагийн парламентад орж ирээгүй байх үедээ авсан зээлийг урд, хойноос нь ухаж шалгааж байгаа харагдсан шүү. Бас дуудсан цагт гарын дор гүйгээд ирэх болохоор нь одоогийн Хөгжлийн банкны захирал Н.Мандуулыг хүртэл авчраад суулгачихсан байх шиг. За тэгээд гайхамшигтай том улстөрчид, групп, компаниудын эзэд нь гэгээн дүрээ үзүүлэхээ ч бүр байлаа. Нярав, нягтлангуудаа өөрийнхөө оронд явуулчихдаг болж. Энэ янзаар сүүлийн өдрүүдэд сонсголд тоож ирдэг ч хүнгүй боллоо.

Их л сүрхий эхэлсэн сонсгол сүүл рүүгээ хэтэрхий намчирхсаны л тод жишээ юм даа. Сонсголд очихгүй байгаа том толгойтнууд бол эрх баригч намын харьяалалтай улсууд л юм байна. Ирсэн ганц нэг нөхөр нь хээвнэг пээдийж байснаа яваад өгдөг. Тэд Хөгжлийн банкны сонсголд ингэж л хандацгааж байна.

Харин сөрөг хүчнийхэн болохоор ардаа ямар ч ажилтай байсан цагтаа гүйж очоод хариулж суугаа харагддаг. С.Баярцогт, Н.Батбаяр, Х.Баттулгаас өгсүүлээд бүгд л очиж тайлбар өгсөнийг орон даяар харлаа шүү дээ.

Үндсэндээ сонсголыг ахалж байгаа Б.Энхбаяр гишүүн өөрийнхөө ярьсныг өөрөө сонсдог, өөрийнхөө асуусанд өөрөө хариулдаг боллоо. Эцсийн бүлэгтээ Хөгжлийн банкны сонсгол гэж нэг иймэрхүү янзтай болж хувирлаа. Уг нь цаашдаа нээлттэй сонсголыг жинхэнэ утгаар нь явуулбал манай нийгэм, улс төр эрүүлжихэд маш их хэрэгтэй л байгаа юм даа.

Эх сурвалж: Өдрийн сонин