ХБ, нүүрсний хулгайн гэх авлига албан тушаалын холбогдолтой хэргүүдийн дуулианы араас "Шарк танк" нэвтрүүлэг гарахад сошиал орчин, мэдээллийн хэрэгслүүдээр янз бүрийн шүүмжлэл, олон өнцөгөөс өрнөж байна. Монголчууд гадаадын шоу нэвтрүүлгүүдийг албан ёсны эрхтэйгээр, эсвэл багахан өөрчлөөд даган дуурайх маягаар телевизийн салбарт хүчээ үзэцгээх болжээ. Интернэт сошиал өргөн хэрэглээтэй, тогтмол хандалттай учраас телевиз үздэг хүн улам цөөрсөөр. Хүмүүс ихэнхдээ зурагтныхаа өмнө мэдээлэл авах гэж бус энтертайнмент, зугаа цэнгэл үзэж амрах цагаараа ашиглах болжээ.

Шоу нэвтрүүлэг бүр өөр өөрийн онцлогтой ч эдийн засгийн агуулгаар цөөхөн. Шарк танк нэвтрүүлэг эхэндээ нийгэмд эерэг сэтгэгдэл авчирсан ч сүүлийн үед улс төрчид томоохон бизнесмэнүүдийн үнэн төрх ил болсоноор ард түмний дургүйцэл дэврэх шалтгаан буй бололтой. Ялангуяа олон жил төрд ажиллаж буй эрхмүүдийн үр хүүхэд телевизийн хойморт бизнес, амьдрал ахуй, өөрийгөө ялан дийлэх, ёс суртахуун гэх мэтийн өөрсдөд нь тохироогүй том малгай өмсөөд суугаад байхаар арга ч үгүй биз.

"Автобусанд ч сууж үзээгүй баян айлын хүүхдүүд ард түмэнд амьдрал заах гэлээ..." Хэмээх сэтгэгдэл олон таарлаа.

Монголчууд атаархуудаа, эсвэл бялдуучдаа, бүр байж ядсандаа ч баячууддаа тэр тусам шарк гэх хэдэн залууст хурц шүүмжлэл өрнүүлээд байгаа гэж боломгүй. “Урьдын гавъяа уул овоо шиг байлаа гээд өнөө үйлдсэн хэргийг цагаатгаж үл чадмуй...” гэсэн эрх зүйн тун чадмаг сэтгэлгээтэй ард түмэнд авлигачдын хүүхдүүд аав ээжийнхээ мөнгөөр телевизээр сургаж зааварлаад, сэнхрүүлж сэхээрүүлэх гээд байна... гэх.

Хэн ч эцэг эхээ сонгож төрдөггүй, хэнийч аав, ээж юу ч хийж амьдрах, ажиллах бүрэн эрхтэй, харьцангуй ойлголт ч шударга ёс, тэгш байдлын эрэлт хэрэгцээгээр ангаж, цангасан нийгмийн арга ядсан илэрхийлэл болов уу.

Олон улсад түгээмэл ойлголтоор бол “шарк” бол бизнесийн салбрт өөрсдийн хүч, нөөц бололцоо, эрдэм боловсрол, чадвар чансаагаараа манлайлж, ёс суртахуунч, үлгэр жишээч нэгэн байдаг аж. Нийгэмд тэгш бус байдал туйлдаа хүрэхээр хүн ам сийрэг монголчууд нэгнийгээ нэвт шувт хардаг зангаа тавихгүй байгаа нь нэг ёсны дархлаа болов уу.