Нийслэлийн Иргэдийн Төлөөлөгчдийн Хурал эхлэхэд түгжрэл, бохирдол, өвчлөлд живэх шахсан 1,6 сая хүн амтай Улаанбаатарын асуудал шил дараад хөглөрч байхад засаг дарга Сумъяабазар хуралдаа ч ирэхгүй иргэдээс сонгогдсон төлөөлөгчдийн өмнө ажлаа дүгнэж, тайлагнах янзгүй дүлий дүмбэ оргиж байгаа аж. Олон жилийн дунджаас хүйтэн өвөлжиж халтиргаа гулгаа, түгжрэл, утаа мэтийн мянга түмэн асуудал шийдлээ хүлээж байсан ч дөнгөж 1 сарын эхээр л зам талбай цэвэрлэх машин болон шинэ автобуснууд 32 ширхэг орж ирсэн ч эдгээр хөрөнгө оруулалтын цаана тендерийн будилаан байна уу? гэх хардлага олон нийтийн дунд нэг хэсэг хөвөрдөөд амжсан.

Улаанбаатар хотын агаар усны бохирдол хэвийн хэмжээнээс хэтэрч эрүүл хүн амьдрах боломжгүй болсон нь эрүүл аюулгүй орчинд амьдрах иргэдийн үндсэн эрхийг ноцтой зөрчиж удсан юм. Энэ бүхний эсрэг ямар зохицуулалт, төлөвлөгөө, менежмент хөтөлбөр хэрэгжүүлэв?

Гүйцэтгэх удирдлага Д. Сумъяабазар дарга үүнд хариулт өгөх учиртай. Энэ талаар өчигдөр НИТХ-ын төлөөлөгч Т. Батцогт: Хуралдааны ирц 80 гаруй хувьтай, төлөөлөгчид чухал асуудлууд хэлэлцэхээр хуралдаандаа иржээ. Бидний гаргах шийдвэрийг гүйцэтгэх албан тушаалтан маань хаана байна? Сумъяабазар дарга байгаа юу?, байхгүй юу?

Сая хурал эхлэхэд өвчтэй, чөлөөтэй, тасалсан...Гэсэн ямар нэг мэдээлэл авч чадсангүй. Шалтгаантай байсан ч өөрийг нь сонгосон, иргэдээс сонгогдсон төлөөлөгчдийнхөө үгийг сонсоод, ямар шийдвэр гаргахыг яаж гүйцэтгэх вэ? Гэдгийг ойлгоод сууж баймаар байна. Үндсэн ажлаа хийж чадахгүй бол өөрчилье. Иргэдийн бухимдал дээд цэгтээ хүрлээ. Хотын дарга хуралдаа суухгүй бол огцруулах саналыг бичгээр гаргана гэдгээ албан ёсоор мэдэгдэж байна... Гэлээ.