Хоохорын Бадамсүрэн Эрдэнэс Монгол ТӨХК-ийн Зэсийн группийн захирал сард 15,500,000₮ цалинтай.

Нацагийн Багабанди ОТ ТУЗ-ийн гишүүн сард 25,000$ цалинтай.

Эдгээр эрхэмүүдийн жилийн цалингийн хэмжээг тооцож үзвэл хэдэн тэрбум, олон аймгийн төсвийг нийлүүлсэнтэй тэнцэнэ гэх. Энэ чинь л нөгөө тэгш бус байдал биш юм уу? Бүх хямралын үндсэн шалтгаан тэгш бус байдал, нэг нь нөгөөгөөсөө онхи өөр боломж эдэлдэг гажуудал бус уу? Төр, төрийн өмчийн байгууллагад ажиллах ганц хоёрхон хүмүүс сая сая ядуусын өдрийн хоолыг булааж тансаглалд умбаж байгаа л хэрэг. Нэг их хэцүү тоо бодож, өөр шалтгаан хайх шаардлага алга. Ердөө л бусдаас баян байх бусдаас давуу эрхтэй, нууцлаг өндөр хана хэрэм мэт орших хамгийн ядуу сэтгэлийг төвөгшөөлгүй тээгчид л юм даа.

Хуульчлагдсан хулгай гэх юм уу? дархан эрх гэх юм уу? феодализм гэх үү? Ямар ч байсан иймэрхүү том шимэгчид өнөөгийн ядуурал, гуйланчлал, ажилгүйдэл, авлигалд живсэн нийгмийн томоохон вирус мөн шүү дээ. Эцсийн эцэст төсвөөс, нүүрснээс, банкнаас улаан гараараа шүүрэгчдийн цаад эзэд нь ч тэд.

Дотоодын ч гадаадын ч авлигал дээр тогтож хулгайгаар саваа дүүргэдэг компаниудын хорыг найруулж, хосыг шувтарч суух ийм бурангуй шударга бус байдалтай л тэмцэж, урхагаар нь намжааж чадахгүй бол шинэчлэл шийдэл гэх уриа дуудлага бүхэн хадны цуурай шиг хоосон зүйл болно.

Хэрвээ иргэд нь адилхан биш юм аа гэхэд ядаж гэдэс цатгалан мөр бүтэн, залуус нь хөдөлмөрлөх таатай нөхцөлд эх орондоо амьдрах бололцоотой сон бол тэгш бусд байдлын тухай тэгэж их хөөцөлдөх хүн гарахгүй л байсан болов уу? Гэтэл сум, баг, аймгийн хэмжээний мөнгө хөрөнгөөр ганц хоёрхон хүний гэр бүл ханаж цадахаа үл мэдэн тэтгүүлж байгаа нь нүдэн дор тээглэх өргөс мөн.