Бизнес эрхлэгч, ард түмнийг ялгалгүй сөрөг нөлөөлөл үзүүлж байгаа зүйл нь үнийн өсөлт. Нийслэлийн төвийн 6 дүүрэгт байрладаг 17 хүнсний зах, худалдааны төвд хийсэн 36 нэр төрлийн хүнсний бараа бүтээгдэхүүний үнийн 2023 оны 04-р сарын 03-ны өдрийн ажиглалтаар өмнөх долоо хоногоос 22 нэрийн барааны үнэ тогтвортой, 5 нэрийн барааны үнэ буурсан, 9 нэрийн барааны үнэ өсжээ...Гэж НСГ-ын мэдээнд дурджээ. Хүнсний гол нэрийн бүтээгдэхүүний дийлэнх нь тогтмол улирал тутам үнэ нь нэмэгдсээр буурах хандлага ажиглагдахгүй байгаа нь төгрөгийн ханшийн сулрал, иргэдийн амьжиргааны доройтол, худалдан авах чадвар буурсантай холбоотой. Өөрөөр хэлбэл төр, Монгол банкнаас хамаарах үнийг зохистой түвшинд барих бодлого хэрэгжихгүй байгааг илэрхийлж байна.

Цалин орлого дорвитой нэмэгдэхгүйн дээр мөнгөний ханш ийм сул үед өрхийн амьжиргааны түвшин эрчтэй буурч дунджаас ядуу давхарга руу шилжих тоо улам нэмэгдсээр. ҮСХ-ны судалгаагаар өрхийн орлого зарлагаа нөхөх хэмжээнд бус харин ч үргэлж тодорхой хувиар илүү зарлага гарч байгааг харуулжээ. Үндэсний статистикийн хорооны тайлан мэдээнд дурдсанаар Хэрэглээний бараа, үйлчилгээний үнэ 2023 бүх аймагт өмнөх оны мөн үеэс 10.2-15.4 хувиар өссөн байна.

Улаанбаатар хотод 2023 оны 2,3,4-р сард хэрэглээний сагсны 404 нэрийн бараа, үйлчилгээнээс 144(35.6%) нь үнэ өмнөх сараас өсөж, 23 (5.7%) нь үнэ буурч, 237 (58.7%)нь үнэ өөрчлөлтгүй байна. Өөрөөр хэлбэл орон нутагт ч нийслэл хотод ч ялгаагүй хүнс барааны үнэ онцын өөрчлөлтгүй харин ч ихэнх нь үнийн өсөлттэй байгаа аж. Үнийн өсөлтийн энэ их хямрал нь иргэдийн худалдан авах чадварыг, аж ахуй нэгжийн зээлээ төлөх, зээлжих зэрэглэл, бизнесээ явуулах нөхцөл зэргийг боомилдог гол аюул мөн. Банкны болоод импортын эдийн засгаас бүрэн хамаардаг Монгол улс үнийн өсөлтийн үр хөврөлийг шалтгааныг бууруулж чадах уу?