Юм л бол будаж, гангалах, шинэчлэх донтой эрх баригчдын өнгөц үйлдлүүдээс түмнээ гэх сэтгэл, хямралыг гэтлэх чадвар ухаан илт дутагдаж буй нь харагдлаа. Ордны хашааг шинэчлэн будаж, гоёж гоодон ногоон өнгөөр пялайлгахаас илүү түмний зовлон зүдгүүр, хоосрол ядуурал, гуйланчлал, архидалт, дүрвэлтийн шалтгааныг судлаад тогтоочих хүсэл ч төрөхгүй байгаа нь туйлын харгис юм. Төрийн ордны дотор үйлчилгээний газрууд нээгдэж үйл ажиллагаа явууллаа гэх мэдээлэл цахим орчинд тархсан нь ч иргэдийн бухимдалд гал нэмсээр. Учир нь үнийн өсөлтөд дарлуулж буй олон түмний сэтгэл зүй эмзэг, аливаад төрийг буруутгах хандлага нэмэгдсэн.

Төр гэдэг ойлголт анхнаасаа ард түмэнд үйлчлэх зорилготой байсаар ирсэн. Эрх мэдэлд суугчид төрийн үйл ажиллагааны үндсэн зарчимд нийцэхгүй дур зоргын шинжтэй үйлдлүүд олныг хийснээс төр хямрах, үндэсний тусгаар тогтнол эрсдэлд орох шалтгаан болно. Түшмэдүүд өөрсдийн эрх ямбанд тааруулан төсвийн мөнгийг зарцуулах явцуу шийдвэрийг гаргах нь төр үгүйрч устахын цондон мөн.

Төрийн үгүй болох үндэслэл

Төр үүссэн шиг бас үгүй болж болно. Байгалийн гамшгаар, гаднын түрэмгийллээр эсвэл өөр улсад сайн дураар нэгдсэн, нэгдэл холбоо задарснаар төрийн шинж (нутаг дэвсгэр, хүн ам, нийтлэг эрх мэдэл) алдагдсаныг төр үгүй болох гэнэ.

Төр үгүй болохоос сэргийлдэг үндсэн гол механизм бол иргэний нийгэм. Иргэдийг үг хэл үзэл бодлоо илэрхийлэх эрхээ эдлэхийг нь хуулиар хориглоогүй ч тэднийг төрийн өмнө хүчгүйдэх байдлыг нь далимдуулан үндэслэлгүй баривчлах нь дарангуйлал буюу төр өөрөө өөрийгөө үгүйрүүлэх үйлдэл мөн.

Товчхондоо төрийг төр биш болгож буй эрх мэдэлтнүүдийн алдаа завхралыг түшмэлүүдийн тансаглал-хуулийн зарчим алдагдах гэж хураангуйлж болно.

Бодлогоор ард түмнийг удирдаж, улс орны нийгэм эдийн засгийг чиглүүлнэ гэдэг нь ордон тойруулж хэрэгтэй хэрэггүй хашлага барих, авлигач түшмэдүүдтэй үгсэн тохирох огтхон ч бус. Асуудлын эрэмбэ дарааллыг цэгцлэн, урхагт нөхцөлийн мөн чанарыг тогтоохгүйгээр муйхар аргаар засгийн бодлого баримтлагдаж, мулгуу сайд дарга нар төсвийн мөнгийг үлгэрт гардаг алтан загас гэж бодсоор байвал өөдлөх аргагүй.