4-р сарын 23-ны өдөр МАН-ын бүлэг мэдэгдэхдээ “өмнө нь төрийн албан хаагчдын цалинг нэмэхдээ тэгш бус хандсан учраас ялгааг арилгах үүднээс төрийн албаны цалинг нэмэгдүүлнэ” Гэв. МАН-ын бүлгийн дарга Д. Тогтохсүрэн: -Өнгөрсөн онд цалин нэмэхдээ ялгавартай нэмчихсэн. Энэ ялгаварлыг арилгах хэрэгтэй байна. Орон нутагт илүү нэмэгдчихсэн. Бага тушаалын албан хаагчид, соёлын салбар, төрийн нийтлэг үйлчилгээний ажилтнуудын цалин нэлээн хоцрогдолтой байгаа... хэмээн мэдэгдсэн нь иргэдийн бухимдалд цучил нэмлээ.

Төв орон нутаг болон яам тамгын газруудын цалингийн тогтолцоо тэнгэр газар шиг ялгаатайн дээр орон нутагт цалингийн бодлого эергээр туссанаар төрийн албаны хүний нөөцийн асуудал шийдэгдэх нь гэж байсан нь эсрэгээрээ болж байх шиг.

Эрх баригчдын цалин нэмэх сүржин мэдэгдлүүд нь цаагуураа улс төржилтийн хөөрөл агуулаагүй гэх газаргүй. Сонгууль дөхөхөөр төрийн албан хаагчдын цалин нэмэгдэж улмаар МАН-ын дор төрийн албыг атгасан хүчирхэг арми босож ирдэг гажиг үзэгдэл бодит болсон нь нууц биш.

Тооцоо судалгаагүй гэнэтийн шийдвэрүүд ямагт эрсдэл дагуулдаг. Төрийн албаны цалин нэмэгдэх сургаар арай чүү тогтворжих шахаж байсан үнийн өсөлт эргээд хөөргөдөх бололтой. Туйлдсаны дараах сул дорой эдийн засагт төрийн албаныхны цалинг нэмэх чадал үлдсэн эсэхийг тооцох шаардлагатай.

Муу нуухаар сайн илчил гэгчээр ажилгүйдэл, ядуурал, дүрвэлт, үнийн өсөлт, төгрөгийн ханшийн сулралыг бууруулах боломж үнэхээр гарсангүй. Цалин тэтгэврийг дараагийн жилүүдээс үе шаттай нэмэгдүүлэхээр ажиллаж байна гээд шулуухан мэдэгдэх нь эрх баригч нарын цаашдын үйл ажиллагаанд өгөөжтэй ч төр засгийг намчирхалд автуулсаар.