Сүүлийн үед төрийн үйл ажиллагааг шүүмжилсэн хэн ч хоригддог, хавчигддаг, дарамтлуулдаг байдал газар авчээ. Ард түмэн Үндсэн хуулиар олгогдсон эрхээ эдлэхийн оронд төрөөс айж бэмбэгэнэх хэмжээнд хүрнэ гэдэг дарангуйлал хүчээ авсны дохио. Төрийн жинхэнэ хүч, шударга нэр хүндийг ард түмэн бус авлигад идэгдсэн түшмэдүүд нь уруу татдаг нь жам.

Иймд өнөөгийн ЗГ, УИХ, Ерөнхийлөгчийн институд өөрсдийнхөө уламжлалт арга барилаас салж улс төрийг цоо шинэ эрүүл сэтгэхүйгээр удирдахгүй бол нам нь бүү хэл улсаараа хөмрөгдөхөд бэлэн болсныг олон жишээ нотолдог.

Гагц эдийн засгийн шалтгаан, улс төрийн хор хутгаасанд анхаараад нийгмийн шинжтэй өөрчлөлт хийхийг огтхон хүсэхгүйгээр ямар нэг сайн сайхан гэрэлт ирээдүй боломжгүй. Өөрөөр хэлбэл сэтгэхүй, ёс суртахуун, хуулийн зарчим бүгд нэг ижил хэмжээнд яригдаж л асуудал шийдэгдэх эмзэг байдалд хүрээд байна.

Үндсэн хууль, сонгуулийн хууль, намуудын хуулийг ард түмнээс аль болох ангижруулан зайчлах санаархал эрх баригчдын арга ажиллагаанаас улам бүр мэдрэгдэх болсон. Улс төрийн бохир тохироо хэлэлцээрт нийцсэн буюу олигархи бүлэглэлийн эрх ашигт хамаарах төрийн дэглэм тогтоохоор улайрах нь эцэстээ сайн үр дүнд хүргэхгүйг олон түмэн гадарлах.