Буруугаа бусад руу бухах, алдаагаа алсаас эрэх, хулгайгаа хуудуугаар далдлах сурмаг араншинтай эрх баригч намын бүтэлгүйтэл улс орныг сүйрэлд хөтлөх хэмжээнд хүрсэн ч адган тогтоож байгаа түр зуурын нэг хүчин зүйл бол авлигалтай тэмцэхээр эрслэх зарим оролдлогууд. Юун түрүүн өөрийнхөө алдаа дутагдлыг ухамсарлаж сурахыг ямар ч зөв чиг баримжааны ухагдахуун баримжаалдаг. Наад захын үнэн, шударгын эрмэлзэлгүй болчихсон уу гэмээр төр зайдлагчдын дүр төрх сүүлийн үеийн хямралын урхаг уршиг болов.

60 тэрбум, оффшор, хууль бус гэрээ, ЖДҮ-ийн санг тоносон, Хөгжлийн банкны, нүүрсний хулгай гэх мэтийн олон их наядаар хэмжигдэх төрийн түшээдийн хулгай луйврын нэг ч хэрэг гэмт үйлдлийн хэмжээнд үнэлэгдэн хууль шүүхээр шийдэгдэж, ард түмний амьдралд өөрчлөлт гарсангүй. Муу хууль гэж байдаггүй өчүүхэн улс төрчид л гэж байдагж аж.

Үндсэн хуульт тогтолцоо, парламентын засаглал, сонгуулийн чөлөөт систем одоохондоо хүн төрөлхтний одоогийн хамгийн боловсонгуй нийгмийн хөгжлийн загвар мөн ч авлигалд олон байраар ухарч шившиглэх манай улс төрчид чухам ямар тогтолцооны гайхамшигт өөрчлөлт хийж алмайруулах гээ юм бол? Тогтолцооны гэхээсээ илүү ёс суртахууны тооны бус чанарын өөрчлөлт, дэвшил нэн даруй хэрэгтэйг ард түмэн ойлгоно.