Сүүлийн үед шинэ тутам Соёлын яамны сайд нэлээд шүүмжлэлд өртөөд байна. Эрх баригчдын бүлэг фракцуудын ээлжит зодоон уу эсвэл сайдын өөрийнх нь бүтэлгүйтэл, хариуцлага муу байдал түүний байр суурь сошиал орчинд ганхахад хүргэв үү. Чойжин ламын музейн газарт байшин барих, соёл урлагийн ажилтнуудын цалингийн асуудал, бүүвэйн дууг судлахад зориулж 40 сая төгрөгийн төсөл санхүүжүүлсэн зэрэг оновчгүй, мэдээлэл, судалгаа муутай ажлуудаас нь болж нийгэм бухимдалд автаад байна. Түүний үйл ажиллагааг шүүмжлэх олны танилуудын бичвэрээс дурдвал.

Сэтгүүлч Л. Мөнхбаясгалан: ... Соёлын сайд Чойжин ламын музейг ер нь үзсэн болов уу. Ямар учиртай яаж байгуулагдсан Монголын түүхэнд ямар үүрэг гүйцэтгэсэн, 700 гаруй сүм хийдээ устган шатааж байсан аймшигт цаг үед ч энэ сүмийг хэрхэн авч үлдсэнийг тэр мэдэх үү. Тэр даанч мэдэхгүй л дээ. Тийм болоод л Чойжин ламын сүм музейн газар руу халдаж байшин барьж болно гэж бодож чадаж байна.

Түүний нүд, сэтгэлд энэ сүм бол хоцрогдсон бүдүүлэг нураачихмаар санагдаж байгаа. Нурааж хаяад оронд нь том зочид буудал барихаар сэтгэж байж мэдэх юм. Хэрэв үгүй бол сайн л байна. Түүний хэлж буй үг , гаргаж хандлага нь зөрүүтэй тул үүнийг бичиж сууна. Энэ музейг зочид буудлын менежер Ч.Номин байтугай маршал Х.Чойбалсан хамгаалж үлдээсэн түүх соёлын үнэлж баршгүй өв билээ... Гэсэн бол МУАЖ, дуучин Ш.Чимидцэеэ: - Нутаг нутгийн бүүвэй дууг чөмгөө дундарч, үсээ цайтал явж, олон хүнтэй уулзаж олон зуун км замыг туулан 2008 онд өөрөө бүгдийг аялаад бичих ёстой зүйлүүд, үүсэл гарал гээд бүгдийг гаргаж билээ.

Тэгж явахад 4000 төгрөг ч гараагүй. Би хэн нэгнээс тусламж гуйгаагүй..Өөрийнхөө чадлаар л болгосон юм даа. Төсөл нэрээр завшигчид идэж уух гээд 80 саяыг төсөлж дээ. Мөнгө тоолох бус мэдэх хүний ухааны сумыг төөлж баймаар юмаа...Арай л байна даа сайд минь...Гэжээ.

Монголд чөлөөт нийгмийн орчин хэдий шүүмжлэлтэй ч зарим талаараа сайн хөгжиж буйн илрэл ийнхүү сайд нарын үйл ажиллагааг нийгмийн идэвхтнүүд хүчтэй шүүмжлэн алдаа дутагдал нь ард түмэнд ил харагддаг болсноос харагдаж байна. Соёлын сайдын баримталж буй бодлого нам, бүлэг,танил тал, садан төрөл гэх мэтийн хууль бус холбоо сүлбээгээр улсын төсвийг буруу зарцуулж байна уу гэх хардлага араасаа дагуулж байгаа бол хариуцлагын асуудлыг ярих цаг нэгэнт болжээ.