Боловсролын зээлийн сангийн мөнгөөр эрх баригч намын нэлээдгүй улс төрчдийн хүүхдүүд ихэвчлэн гадаадад олон зуун сая төгрөгийн зээл тэтгэлэг авч суралцсан асуудал хөндөгдөж салбарын сайдаасаа эхлээд сандралтай. Гэмт хүн гилбэлзэнэ гэж нэг монгол үг байдгийг юун түрүүн сануулах. Шүгэл үлээсэн Сийлэг багшийн хөлд нь боловсролын сайд зөөлхөнсууж “...уучлалт гуйлаа, эргээд ажилдаа ор, буруу ташаа мэдээллийг залруулах... ажлын хэсэгт орж ажиллах...” гэхчлэн жиргэсэн нь нийгэмд шударга ёсны гэрэл асаасан нэг сурган хүмүүжүүлэгчийг сайд нь тун эмзэгээр хүлээж аваад л онцлоод байх хэрэггүйг харуулж олны дургүйцэл хөөргөдөх шалтгаан боллоо.

Асуудлыг тэртэй тэргүй хууль хяналтынхан тогтооно. Нэр холбогдсон бүх эрх мэдэлтнүүдэд хариуцлага тооцож чадахгүй л. Гэвч ядаж биеэ өмөөрч улаан цагаан ард түмнийг илт доромжилсон үг үйлдэл хэрэглэхгүй байх нь ёс зүйн хэлтэрхий.

Боловсролын сайд Энхамгалан болон УИХ-ын гишүүн сайд Ц.Даваасүрэн нарын мэдэгдлүүд олны бухимдлыг улам өрдсөөр. Учир нь хөрөнгө оруулалтаас ихээхэн хамаарах онцлогтой чанар хүртээмжгүй хэр нь амьжиргаагаа дааж ядах ард түмний сэтгэлийн шарх болсон боловсролын асуудал эмзэг хэвээр атал өөрсдийнх нь хамааарал бүхий хүмүүс гадаадад зээлээр суралцан тэр ч байтугай сургалтын төлбөр бус амьжиргааны тэтгэлэг гэх нэрийн дор олон зуун саяар тоологдох мөнгө кармалсан баримт гарахад “...зээлийн сангаар суралцагчдын эх орондоо оруулсан мөнгөөр үнэлэхгүй хувь нэмэр...150-60 хүүхэд л яригдаж байна шүү дээ...би юм ярих гэхээр өмөөрсөн болчих гээд байна...манай дүү юм билээ...алдаа дутагдал байгаа л байх...үнэгүй боловсрол ч гэсэн амьжиргааны зардал гардаг...хамтдаа шалгах хэрэгтэй... гадаадад суралцаж байгаа хүүхдүүд амиа хорлох гээд байна... би тэр зээлийг чинь төлөх ёсгүй юм билээ...” гэх мэтчилэн хэвлэлд ярьсан үгсээс нь харахад л тэдний хандлага ил болж байгаа юм.

Гэтэл жирийн ард түмэн арилжааны багахан зээлээ нэг хоёр хоног хугацаа хэтрүүлэхэд банкнаас дарамталж эхэлдэг бол улс төрчдийн зээл “устсан...ташаа мэдээлэл байсан...надад хамаагүй...” гэдэг үгтэйгээр мартагдах уламжлал тасрахгүй бололтой. Сайд дарга аав ээжийнхээ нөлөөгөөр гадаадад суралцах хүүхдүүд нь амиа хорлох мэдэгдэл хийж байгаа юм бол тэдний балагаар өч төчнөөн жил ядуугийн зовлон амссан ард түмэн яах болж байна?