Хөдөлмөр нийгмийн хамгааллын яамны сайд Х.Булгантуяа санаатайгаар нүүрсчдийг өмгөөлөн ярьж ард түмнийг бухимдууллаа. Энэ бол Монгол Улсын эдийн засгийг хохироосон хулгайч улс төрчдийг өөхшүүлж, ард түмнийг доромжилж буй хэрэг. Урьд нь Сангийн яамны дэд сайдаар ажиллаж байхдаа Монгол улсыг саарал жагсаалтад оруулах хорлонтой шийдвэр гаргасан нь мартагдаагүй байна. Улс төрийн зарчим, төрийн албаны хууль тогтоомж, шалгууруудын хаагуур цогиж яваад ороод ирсэн нь тодорхойгүй давхар дээлтэй сайдтан огцорч шударга ёсны шинэчлэлийг ам уралдан яриад яваа МАН-ын удирдлагуудын нэр хүндийг аврах гарц харагдаж байна.

Салбарын өмнөх сайд Д.Сарангэрэл ард түмний амьжиргааны түвшинг тодорхойлж хэвлэлээр ярихдаа “улны” гэх үг хэрэглээд Ерөнхий сайдын тушаалаар огцорсон нь ёс зүйд нийцэх ч энэ удаа Х.Булгантуяа нь “нүүрсний хулгай нарт хариуцлага тооцох нь үнэт зүйл байж болохгүй” гэчихсэн нь цаагуураа өөрөө ч нүүрсний бүлэглэлтэй холбоотой байж болох сэжүүр юм.

МАН-ын угшилтай улс төрчдөд нэг том дутагдал бий. Тэд өөрсдийн буруутай үйлдэлдээ уучлалт гуйж огт мэддэггүй. Энэ нь хувь хүнийхээс илүү намынх нь хүмүүжил. Социализмын үед үзэл суртлаар хүмүүжсэн дарга анги бол угаас нийгмийн тэргүүлэх хэсэг учраас шүүмжлүүлэх боломжгүй, ард түмэн шүүмжлэхээс айдаг байсан ба одоо бол эрүүл нийгмийн төлөө мачийж яваа 21-р зууны үед Х.Булгантуяа нүүрсчдийг хамгаалж байгаагаа нуугаагүйнхээ төлөө ёс зүйн үүднээс уучлалт гуйчих л асуудал.

Гэтэл “намайг олон хэлтэй болохоор атаархлаа, сошиалаар харлуулж байна...салбарын шинэчлэлийн төлөө няцахгүй” гэх мэтээр улам гөжүүдэлсэн нь түүний янтгар аашийг тодруулж төр ёсыг доромжилсон хэрэг. Сэтгүүлч МУСГЗ Б.Ганчимэгийн бичсэнээр “..Х.Булгантуяа мерит зарчим дээр суурилсан замналгүй атлаа эрхэлж тунирхаж, тэнэгтэж байгаагаасаа ичих хэрэгтэй...Монголын төр түүний эрхэлдэг гэр орон, бүждэг pub биш.”