Эдийн засгийн чөлөөт зах зээлийн онолоор шинэ нийгэм сайн сайхан болно гэсэн амлалтаар түмний ахуй амьдрал өнгөн дээрээ сайжирсан мэт ч үнэндээ өрөнд баригдаж өтөнд идэгдсээр. Ядуурал, ажилгүйдэл, үнийн өсөлтийн үзүүлэлтүүд үргэлж үлгэн салган тоон дээр уягдаж өөдтэй өөрчлөлт шинэчлэл өсөлт дэвшилтийг хангаж дийлэх нь байтугай улс төрчдийн өлөн шуналаас өндийж амжихгүй салгалсаар. Дарга сайд нар энд тэнд очиж гоё сайхан өнгө зүсээр шилбэлзэж гол нь харлах шахан зүдэрч буй ард түмнээсээ яаж сонгуулийн оноо цуглуулах вэ гэдэгт анхаарч бодит үр дүн мэдэгдэхүйц өөрчлөлтийг бол харин таг мартацгааж байх шиг.

Зудын малыг гялгар цаасаар түр хуурч амь зогоолгох шиг зовлонд нэрвэгдсэн Монголчуудыг наадмаар далимдуулан сайн гэгч нь худал хөөргөдөөд онгироогоод, тамир тэнхээг нь нэлээд шавхлаа. Одоо хүйтэн өвөл хөр цөс нүүрсний утаа тог цахилгаан, өвс тэжээл гээд түм буман асуудлууд араасаа ундарна.

Ухаалаг бус урагш муутай хэрүүлч эрх баригчдын унхиагүй шийдвэрүүдэд орооцолдон түүртсэн бидний амьдрал үргэлжилсээр. Ийм байдалтай ард түмнээс сэтгэлгээний сийрэгжилт, нийгмийн хөгжил, оюун санааны гэгээрэл шаардаж болохгүй. Бор амьдралаа аргацгаахын хажуугаар өөр юманд санаа зовинох боломж тун хэцүү.