Монгол Улсын төр нийгмийн бүх тогтолцоонд хулгай, залилангийн систем ноёрхсон нь гашуун үнэн. Гэмт хэрэгтнүүдийн мөнгөөр шударга бус шийдвэр гаргаж хариуд нь хувьдаа баяждаг хөгийн албан хаагчид бий болж авлигалын сүүдэр газар бүрд туссаныг арилгах гарц гаргалгаа уг нь бий. Албан тушаалтнуудад хариуцлага тооцож хүчрэх эрүүл цэвэр хуулийн засаглал Монголд хэрэгтэй. Харин хулгайч нарыг засарна гэж найдсаар эцэстээ улсаараа сүйрч мэдэх дүйнгэ байдлаасаа гарахын тулд зоригтой эрс шинэчлэлийн алхмууд чухал.

Төрд ажиллавал төрсөн биеэс өгсүүлээд гэр бүл төрөл төрөгсөд хангалуун амьдарч болно гэх тэнэг ойлголтыг халахад үзэл санааны өөрчлөлт зайлшгүй болжээ. Үзэл санааны өөрчлөлтийг өнгөц төдий бус үндэснийхээ унаган ухамсар сэтгэлгээний дархлаанд суурилж хийвэл сая зөв болно.

Улс төрчид аль нэг намыг боломж гэж харахаас илүү хариуцлага үүрэг гэж дотроо ухамсарлах дориун чиг баримжааг бий болгож чадвал суурьтай шинэчлэл болно. Гэмт хэрэгтнүүд төрд үүрлээд амжсан олон жилийн нэгширмэл уналтыг нийгмийн шинэчлэлийг эрс шийдлүүдээр цэвэрлэх ёстой.

Цоо шинэ гэгээлэг хэр нь судалгаа баримттай үзэл санааны дэвшлийг тарьж ургуулсан улс төрч түүхэнд үлдэх болно. Харийн хоёрын хооронд гурвын дунд үлгэн салган гэлдэрсээр сүйрэл рүү улам хөтлөгч удирдлагууд хожим сайнаар дурсагдах аргагүй.