Сүүлийн хэд хоногт улс төр хөшигний ард буцлам бужигнаантай байна. Эрх баригч намын дотоод өрсөлдөөн хэдий намжмал ч фракцуудын хүчирхэг төлөөллүүд далдуур тохиролцоонд хүрч чадахгүй гэр гэртээ хутгаа билүүдэцгээх. Эрх баригч намын мөрийн хөтөлбөрийн заалтуудаас “100 жилийн ойгоороо 100 үйлдвэртэй болно” гэсэн нь одоо утаа манан болох нь.

Харин сөрөг хүчин Ардчилсан нам ил хэрэлдэж, нүдэн дээр асуудлаа шийдвэрлэхээр оролддог. Гэхдээ тохиролцоогүй эрүүл улс төр Монголын төрд байхгүй. Намын тэргүүн дэд даргаар томилогдсон Сангажавын Баярцогт санасандаа хүрч Лу.Гантөмөр ор нэр төдий нэгэн болох уу?

Саяхан ҮБХ нь хуралдаж 15 дэд даргыг фракцуудаас оруулж ирсэн ч тэд чухам юу шийдэх гэж байгаа нь тодорхойгүй. 200 мянган гишүүдийнхээ намын үйл ажиллагаанд оролцох эрхийг хязгаарлаж 400 гаруй хүн л намын даргаа сонгодог дүрмийн өөрчлөлт нь ардчиллаас ухарсан хэрэг.

Төрийн өндөр сэнтийд заларч буй зарим улс төрчид нэгэнт суурь муутай суудалдаа удаан тогтохын тулд сөрөг хүчнээ өөртөө үйлчлүүлдэг бохир улс төрийн тоглоомоор тоглож байна уу гэх мэдээлэл хөвөрдсөөр олны чихэнд аль хэдийн хүрчээ. Нэгэнт зовлондоо хахаж байгаа Ардчилсан намыг эрх баригч намын удирдлагууд ээлжлэн талхилсаар байвал нийгмийн идээ бээр хорт хавдрын эцсийн шатанд очиж ядуурал ажилгүйдэл, сүйрэл мөхөлд хүрнэ гэсэн үг.

Д.Энхбат