Аймшигт ковидын халдвараар зуу зуугаараа хиарч, араас нь хүчирхийлэлд өртөж,цаг бусаар хүүхэд нялхас амь үрэгдэж, ядуурал ялын бодлого мэт нүүрлэж,ажилгүйдлийн улмаас залуус гадаадад дүрвэсээр Монголын өнөө маргааш гундуухан байна. Монгол хүн бүр 30 сая төгрөгийн өрөнд орж, төрийн өндөр сэнтийд залрагчид 40 их наядаар цөлмөх харгис тогтолцоонд ард түмний нуруу цоорох шахжээ. Түмэн олон эсэргүүцсээр байхад мугуйдсаар Үндсэн хуулийг өөрчилж эрх мэдлээ зузаатган УИХ-ын гишүүдийн тоог нэмсэн. Өнгөрсөн хугацаанд Үндсэн хууль 26 удаа өөрчлөгдөх хүний эрх,эрх чөлөөний зүйл заалтад ганцхан удаа төрийн байгуулалттай холбоотой заалт 25 удаа өөрчлөгдсөнөөс үзвэл Монголын эрх ямбатнууд эгэл ардаа бус тансаглал нь хэтэрсэн түшмэдүүдийнхээ сэнтийд ямбаны зөөлөн олбог нэмдэг заншилтай болжээ.

Сүүлийн өдрүүдэд хүүхэд нялхас харгис гэмт хэргийн золиос болж хайран амиа алдацгааж байхад УИХ-ын гишүүд, эрх баригч нар хэрхэн яаж сандал суудалтайгаа үлдэх вэ гэдгээ дотоод сэтгэлдээ нууж ч эрх мэдлийн дон шүглэж эд мөнгөнд ташуурсан тачаал, ташаарал нь дарагдалгүй эмгэнэл гашуудлын хажуугаар хар хэрээ мэт чанга гуаглах нь зэвүүцэм.

Хүний эрх зөрчигдөж, хүүхдүүд үхэж, хөөрхий ард түмэн ядуугийн зовлонд нэрвэгдэж байхад чихэм ч үгүй суудаг ямбатнууд сонгуулийн сургаар санаа зовох гол асуудал нь сандал ширээ болсон нь тун харамсалтай. Хэдий яаралтай горимоор хүүхдийн эсрэг гэмт хэргийн ялын бодлогыг чангаруулах хуулийн төсөл Засгийн газраар хэлэлцэгдэх гэж байгаа ч асуудалтай эрс шийдэмгий, байнгын тэмцэл хийж углуургаар нь хандахгүйгээр сэтгэлийн хөөрөлд автацгаан хэтэрхий мэргэн жараахай эсвэл бушуу туулай борвиндоо баастайн үлгэр болбол хожим гарах эрсдэлд хэн хариуцлага хүлээх вэ?

Аливаа хямралын уг үндсийг тогтоож,асуудалтай нүүр тулж,шударга бус байдлыг уг үндсээр нь зогсоож чадах эхлэлийг тавьж чадахгүй бол ядаж түмний зовлонгоор зоолж, хүүхдийн үхлээр улс төр хийдэггүй хүн чанараа хумсын чинээ ч болтугай үлдээх сэн, Төр зайдлагчдаа.

Д.Энхбат