Франц улстай хамтран уран олборлох асуудлаар Монгол Улсын Сайд, ЗГХЭГ-ийн дарга, МАН-ын ЕНБДарга Д.Амарбаясгалан мэдээлэл хийлээ. Энэ үеэр түүнээс нэгэн сэтгүүлч: "ОХУ-аас энэ ураны хэлэлцээр хийгдэж байгаатай холбогдуулан манай эсрэг мэдээллүүд гарч байна. Хойноос яг бодитой ирж буй шахалт, дарамт УИХ, Засгийн Газрын түвшинд байна уу? " гэж асуув.

Уг асуултад Д.Амарбаясгалан: "Монгол улс бол аль нэгэн гадны орны хараат улс биш. Геополитикийн ач холбогдолтой аливаа салбарт хэнтэй хамтарч ажиллах асуудлаа бид өөрсдөө шийдэх эрхтэй. Үүн дээр ямар нэгэн байдлаар дарамт шахалт үзүүлэх эрх аливаа улс гүрэнд байх ёсгүй.

Эдийн засгийн хувьд ач холбогдолтой, хөрөнгө оруулалт нь баталгаатай, байгаль орчинд ээлтэй, хүн амьтанд хоргүй байх нөхцөл, технологийг сонгох эрх нь Монгол улсад байгаа. Бид энэ замаар явж байгаа гэж ойлгож болно.

Монгол улсын Ерөнхийлөгчийн БНФУ-д хийсэн айлчлал Монгол улсын түүхэнд анх удаа Европын холбооны улсуудын томоохон төлөөлтэй хийж байгаа маш өндөр хэмжээний айлчлал гэдгээрээ онцлогтой. Францын тал онцгой ач холбогдол өгч, өндөр хэмжээнд тус айлчлалыг зохион байгуулж чадсан. Энэ бол Монгол улс олон улсын түвшинд, геополитикийн түвшинд гуравдагч хөршийн зах зээл дээр ямар хүчтэй гарч ирж байгаагийн илэрхийлэл гэж бид үзэж байна.

Монгол улсын хувьд Франц, Герман, Англи зэрэг Европын холбооны улсуудтай маш өндөр түвшний харилцааг бий болгож ажиллаж байна. Энэ нь хөрөнгө оруулалтын хувьд хамтарч ажиллах нөхцөл, геополитикийн хувьд хамтарч ажиллах боломж бүх зүйлээ баримталж ажиллаж байгаа. Гадна талаас Монгол улсыг геополитикийн талбарт ухаалаг ажилладаг улс гэж дүгнэдэг.

Хоёр хөрштэйгээ найрсаг хамтын ажиллагаатай. Олон улсын түвшинд гуравдагч хөршийн бодлогыг амжилттай хэрэгжүүлж чадаж байгаа гэдгээрээ бид үнэлэгдэж байгаа." гэж хариуллаа. Өөрөөр хэлбэл Монгол Улс гуравдагч хөрш орнуудтай хийх хэлэлцээр, эдийн засгийн төслүүдээ Орос, Хятадаас үл хамааран явуулна гэдгээ Засгийн Газрын түвшинд албан ёсоор илэрхийлсэн явдал болж байна.

М.Чой

Эх сурвалж: Сонин.мн