Улсын нэгдүгээр төв эмнэлэг гадаад хамтын ажиллагаагаа өргөжүүлэх хүрээнд энэ сарын 17-нд БНХАУ-ын ӨМӨЗО-ы Шилийн гол аймгийн нэгдсэн эмнэлгийн төлөөлөгчдийг хүлээн авч, хамтран ажиллах санамж бичигт гарын үсэг зурлаа.

Уулзалтад УНТЭ-ийн ерөнхий захирал Б.Хишигжаргал, эмчилгээ эрхэлсэн дэд захирал О.Баярмаа болон ӨМӨЗО-ы Шилийн гол аймгийн Нэгдсэн эмнэлгийн дэд захирал Шиао Жанг Жүн, Мэс заслын тасгийн эрхлэгч Жанг Нан, Сургалт судалгааны хэлтсийн дарга Лю Шү Жүн, их эмч Чу Ри Яа нар оролцсон.

УНТЭ 2018 оноос тус эмнэлэгтэй хамтын ажиллагаа эхлүүлэхээр яриа хэлэлцээ хийж эхэлсэн бөгөөд энэ удаагийн уулзалтаар УНТЭ, ЗӨСҮТ, Шилийн гол аймгийн Нэгдсэн эмнэлэг гурвалсан хамтын ажиллагааны санамж бичиг байгуулж, бэтэг өвчний тухай судалгааны ажлыг эхлүүллээ.

Мөн ерөнхий мэс засал судлал болон бусад чиглэлээр эмнэлгийн мэргэжилтэн сургах, харилцан туршлага солилцох, эрдэм шинжилгээ, судалгааны ажилд хамтрахаар төлөвлөсөн юм.

Нийтэлсэн: Эрүүл мэндийн яам