МАН сонгуулиар ард түмнээ өрийн дарамтаас гаргах амлалт өгч, мөрийн хөтөлбөртөө тусган гарч ирснээс хойш даруй 7 жил шувтарчээ. Эрх баригчдын ээлжгүй популист амлалт, эрх зүйт ёсыг уланд гишгэсэн авлигалын цэцэглэлтээс болж ард түмний нуруу цоорч, эдийн засаг утгаа алдан сүйрч, нүүрс,алт зэсийн үнэ өслөө ч хулгайч түшмэдүүдийн шуналын сав дүүрсэнгүй. Их наядаар нь хулгайлдаг идсэн уусан өмссөн зүүснээрээ уралддаг цөөхөн баячуудын бэлэн мөнгөний машин, тансаглалын түрийвч сав нь Монгол болжээ. Хүн бүр амьдрах, аж төрөх, ахуйн хэрэгцээгээ хангах боломжоо хүртэл банкнаас зээлээр авч байна.

Товчхондоо өрийн дарамтад орсон өрх айл болгонд өдөр хоногийг лизинг төлж дуусгах л зорилгоор өнгөрөөдөг өлөн зэлмүүн амьдралтай бүхэл бүтэн нийгмийн давхрагат орох л сонголт үлджээ. Өвдлөө гэхэд улсын эмнэлгүүдийн дараалал хэдэн сараар хойшилж, нялхас хүртэл өвчнөө оношлуулахын тулд хэдэн сар хүлээдэг бурангуй харанхуй бүдүүлэг цаг үеийг туулцгааж байгаа нь юутай гашуун.

Өвлийн турш осгохгүйн тулд гэр хорооллынхон утаа тортогонд дунд сүүмэлзэж, зарим нь өглөөний нарыг үзэлгүй ам бүлээрээ амьсгал хураацгаах… Утааг бууруулах хэдэн зуун тэрбумыг “утаагүй зуух” гэх үлгэрт итгүүлэн хувьдаа цулайх баячуудын сэтгэл зүрх элэг нэгтнийхээ төлөө сэтгэл зүрх нь өмрөх нь бүү хэл бах таваа хангадаг бололтой.

Ард түмэн эвдэрхий муу хуучин нийтийн тээврээр зорчиж, удирдлагууд нь төсвийн мөнгөөр харийн хулгайчидтай нийлж улсаа цөлмөн сая сая монголчуудынхаа дулаан цэвэр орчинд зорчих эрх чөлөөг уулгалан дээрэмдэх… Үндэсний язгуур эрх ашгийг хохироосон хэрцгий балмад авлигалчдад хуулийн алганы амт үзүүлэх нь байтугай эрх мэдэлтнүүдтэй сүлбэлдэн шударга ёсыг Үндсэн хуультай нь хамт шороонд булж дээр нь дарс хундагалан найрлах хүртлээ ухамсар нь сарнисан хөөрхий хууль шүүхийнхэн. Амьдрах эрхээ банкнаас зээлж, ажиллаж хөдөлмөрлөж хүн шиг амьдрах эрхээ авлигачдаас хөлс цусаараа хямдханаас хямдхан худалдаж аван гол зогоох хөөрхий Монголчууд.

Д.ЭНХБАТ