Төрийн албыг наймаалцаж, төсвийн сан, банкийг цөлмөж, түйтгэрэл ядуурлын шуурганд автуулж, түмнээсээ хулгайлсаар төр ёсыг уланд гишгэсэн эрх баригчид, нам дамнасан бүлэглэлүүд цагийн эрхээр цагаан цоройгоороо булхай нь цувах өдрүүд наашилсан. Гэвч залхаг заль хоёроор зэвсэглэж, буртаг булхайн хөрөнгөөр бүтсэн “хар машин” зайдалсан луйварчдад Үндсэн хуулийг уландаа гишгэх юу ч байсан бол үндэстнийг мөхөөх харин амаргүй байх. Баялгийг баруун солгойгүй дээрэмдэж, барлаг амьдралаар торлогдуулсан ард түмэн хөөрхий их гүрний уужуу үр сад тулдаа тэсэж байх шиг.

Сүүлийн 30 гаруй жилийн хямралыг дэнслэх юм бол эрх баригчдын нүгэл нүдээрээ гарах хэмжээнд хүрэх ч гэлээ амаа хамхиж ар хударгаар нь сэм сэм хутгалалцаж, хулгайлалцаж, жадлалцаж завшилцсан АН нам ч үйлийн үрээс үүрэлцэх л учиртай.

Гэхдээ сүүлийн 8 жил шахам хугацаанд хэзээ байгаагүйгээр түмнээ ядууруулж, бизнесийн боломжийг нь хувхайруулж, биедээ сольж өмсөх хувцас ч ховор үлдээсэн гашуун үнэн нүүрсний хулгайн 40 их наядаас эхлээд автобусны цавчааны төчнөөн тэрбумаар яригдана. Ийм байхад эрх баригчид ирэх сонгуулиар сонгогдох ичих нүүр үлдэнэ гэж үү? Өрх бүрийг өрөөл үхрийн махны мөнгөөр худалдаад авчихдаггүй л юм бол үнэн нүүр царайгаа юугаар далдалж, үлэмж их хулгай дээрэм, дарангуйлалд ямар халхавч хийх нь таагдашгүй.