Хотын дарга Х.Нямбаатар "Twitter" хуудсаараа дамжуулан гаргасан шийдвэртэй нь санал нэгдээгүй сэтгүүлчтэй 2023 оны 12 сарын 17-ны 20 цаг 36 минутын орчим маргав. Ингэхдээ "Сэтгүүлч шүү ухаантай юм бол олон нийтийн сүлжээнд жаахан ес зүйтэй үг хэллэг хэрэглэж баймаар. Нөгөөтээгүүр 0 зогсолтоос гарах гарц ярих бядгүй масстай нийлээд хашхичихаас өөр шидгүй байх даа чи" гэжээ. Мөн тухайн өдрөө фейсбүүк хуудсаараа дамжуулан “Бухимдсан олонд хандаж хэдэн үг хэлье…Ямар ч шийдэлгүй байцгаая, 0 зогсолттойгоо байх нь илүү гэж үзэж байгаа нь хамгийн аймшигтай зүйл…” Гэж бичсэн бол 18-ны өдөр “Нийтийн сүлжээнд ёс зүйтэй үг хэрэглэж байх тухай,мөн тэг зогсолтоос гарах гарц ярих бядгүй хэрнээ, “массыг манипуляци” хийж хашхичихаас өөр шидгүй сэтгүүлч гэх гэсэн санаа байсан.Таслал алдаж бичсэндээ олон нийтээс хүлцэл өчье” хэмээн 3 удаа нэг асуудлаар ижил шахуу байр суурь илэрхийлснийг дараах байдлаар дүгнэж үзье.

1. Х.Нямбаатар улс төрч, хариуцлагатай албан тушаалтны хувьд ёс зүйгүй үйлдэл удаа дараа гаргаж түүнийгээ өөрөө баталлаа. ХЗДХ-ийн сайдын албан тушаалд ажиллаж байх үед нь хүний эрхийн зөрчил, шүүхээс гадуур албадан хорих явдал хэрээс хэтэрч байгааг олон улсын байгууллагууд хүртэл анхааруулсан байдаг. Гэтэл тэр Улаанбаатар хотын захирагч бөгөөд хотын дарга болж албан тушаал сэлгээд ч ухаарсангүй бололтой.
2. Сэтгүүлч рүү үсчиж арслан бар мэт авирлах үйлдлээс нь улс төрийн хат суугаагүй тэвчээргүй, ойворгон нэгэн гэдгийг нь төвөггүй таньж болохоор байна.Тэрээр ард түмнийг “бядгүй масс” гэсэн нь тэнэг, харанхуй бүдүүлэг, юу ч мэддэггүй гэхчлэн доромжилсонтой агаар нэг. Гэтэл фейсбүүк болон твиттер хуудсан дахь бичвэрүүдийнх нь дарааллаас харвал сэтгүүлчийг болоод ард түмнийг дорд үзэж буйгаа нуухыг хүсээгүй нь илт. Хэдий олон нийтэд манипуляци хийж байгаа сэтгүүлчийг буруутгаж байгаагаа тайлбарласан утгатай бичвэрээр гэмээ далдлан ёс зүйн хариуцлагаас бултахыг оролдож байгаа боловч агуулгаараа ард түмнийг ч дорд үзсэн хандлага нь нүднээ ил.
3. Манипуляци хэмээх үгийн утга нь “manipulation” буюу бусдын шийдвэрт нөлөөлөх аж. Иймд “бядгүй” сэтгүүлч ард түмнийг буюу массыг манипуляцидаж байна гэж хотын даргын хэлж байгаа нь “бядгүй хар масс”-ыг баалж байгаагаа дахин дахин баталсан л хэрэг.Товчхондоо “Бухимдсан олонд хандаж хэдэн үг хэлье” гэж фейсбүүк хуудсандаа бичиж байгаагаас түүний “хэдэн үг хэлье” хэмээн олон нийтийг сэнхрүүлэн, дагуулагч болохоор улайрах дээрэнгүй араншингаас нь үнэртэж байгаа юм. Дарангуйлал хэдийн дүр төрхөө олоод Монголын төрд ноёрхоод удаж байгааг энэхэн жишээнээс бэлхэн харж болохоор.
4. Хэдий олон нийтээс уучлалт гуйсан ч хотын дарга үзэл бодлоо илэрхийлсэн сэтгүүлчийг буруутган элдэв үгээр дахин дахин дайрах нь хариуцлагатай албан тушаалтны хувьд ёс зүйгүй хууль бус үйлдэл юм. Жирийн иргэн, хэн нэгэн сэтгүүлч үг хэл үзэл бодлоо илэрхийлснийхээ төлөө шоронд хоригддог тогтолцоо аль хэдийн биежээд эхэлсэн энэ цаг үед неокоммунизмын биет төлөөлөгч гэж өөрийгөө тунхагласаар байх уу?

Д.ЭНХБАТ