Нүүрсний сонсгол гэх арга хэмжээ үргэлжлээд хэд хонолоо. Муу нэр зүүж, луу дансанд бүртгэхээр пайз зүүлгэж байгаа нь Ардчилсан намын хоёр гурван УИХ-ын гишүүн бас бус хүмүүс байна. Монгол Улсад томоохон авлигалын хэрэг дээр нотлох баримтыг шинжлэн судлах нийтийн сонсгол зохион байгуулж байгаа үйл явц нь нийгэм, улс төрийн хүрээний шуугиан тарьсан үзэгдэл боловч чухам улс төржилтгүй, шударга зарчмаар явагдаж байгаа эсэхийг хэлэхэд эрт юм. Хил, гаалиар хэчнээн сая тонн нүүрс бүртгэлгүй гаргасан нь хууль бус гэгдэж байгаа ч тэдгээрийн эзэн холбогдогчдын нэр хүндэд шууд болон шууд бусаар халдаагүй гэх баталгаа олдохгүй байна.

Шүүхээр гэм буруутай нь эцэслэн тогтоогдоогүй хэнийг ч ямар нэг байдлаар ил далд гөрдөх, нэр хүндэд нь халдах үйлдэл байгаа бол үүнийгээ ч давхар нягтлах шаардлага үүсэж байх шиг байна.

Тодорхой хэлхээ хамаарал болоод эрх баригч намын нөлөөлөл сайтай бүсээс гэрчээр дуудагдсан нэр бүхий хүмүүсийг дуулиан шуугиангүй сонсголд дуудсан болоод өнгөрүүлэх араас нь сөрөг хүчнийхнийг хэвлэл мэдээллээр хавсайдан нүүрсний хулгайч гэж хашхичин цовдлох төлөвлөгөө анхнаасаа ажиглагдаж эхэллээ. Гэвч чухам үнэн баримт юу өгүүлж байгааг л магадлан үзэх, буруутай этгээдүүдэд элдэв өршөөл цагаатгал, хуулийн цоорхойгүйгээр улс хохироосон үйлдэлдээ хариуцлага үүрэх, хохирлоо нөхөн төлөх ёстой.

Энэ удаагийн нүүрсний гэх хэргийг л шударга, үнэн зөвөөр шийдвэрлэж чадахгүй бол Монгол Улсад шударга ёс, хууль шүүхийн байгууллагад итгэх итгэл нэг мөсөн нуран унах болно.

Шударга шүүхээр шүүлгэх ард түмний итгэл найдвар тасарснаар улсын аюулгүй байдал, оршин тогтнохуйтай холбоотой асуудлууд шил даран хүлээж байгааг мартаж болохгүй. Хэдийд ч хэн нэг нөлөөлөл ихтэй улс төрчийн башир аргад автаж улсаа сүйрүүлэн оронд нь хувийн жаргал цэнгэл эдэлдэг урвагч ноёдын түмэн балаг давтагдаж болохгүй.

Д.ЭНХБАТ