Нотлох баримтыг шинжлэн судлах нийтийн сонсгол болж өнгөрлөө. Нүүрс тээврийн компани эрх мэдэлтэй хэн хэнд яаж хамаарах эсвэл хамааруулж болохыг харлаа. Мөн Монгол Улсын уул уурхайн баялаг хаашаа ямар замаар яаж ордгийг ч харлаа. Одоо нэг л асуулт үлджээ. Нүүрс хулгайлсан этгээдүүдийг шүүхээр оруулан гэм буруутай эсэхийг нь тогтоож, зохих хуулийн хариуцлага үүрүүлэх үү? Гэвч энэ асуултын хариу өнгөрсөн хугацааны үйл явдлын хэмнэлээс тодорчээ.

Эрх мэдлийн гинжин хэлхээгээр холбогдож, ил далд бизнесийн холбоосоор хэлхээтэй сүрэг хувалз шиг эх орныхоо өнгөтэй өөдтэйг болгоны шүүсийг сорогч авлигачин бүлэглэлийн санасан хэрэг бүтнэ. Хэн нэг жижиг гаруудыг золиосонд явуулаа хариуцлага хүлээлгэсэн дүр үзүүлэх ба ард нь гэмгүй царайлан үлдэнэ. Ингээд өнөөх бохир савраараа хүрч чадах болгоноо мөлжин үл цадаж хомхойроод газар нутгаа хүртэл харьд зарах хэмжээнд тулчхаад байгаагаа үл ойшооно.

Хэрэгтэй үед эхнэр хүүхэд, ээж аавыгаа ч зарж мэдэх асар их хүйтэн хөндий зальжин худал хуурмаг хулгайч бүлэглэлийн амь тэмцэж байгаа хэдий ч тэднийг залгамжлах хуурсан биетүүд бий. Тэд авлигачин эцэг эхээсээ долоон дор.

Маш аймшигтай өрөвдөх сэтгэлгүй, эх орон гэж мэдэхгүй сувдаг шуналтай этгээдүүд байх болно. Нийтийн эрх ашгийг хэзээ ч бодолцож байгаагүй сонгууль луйвардахыг юман чинээнд тоохгүй, сонгогдсон ч эс сонгогдсон ч Монголыг төрт ёс, тусгаар тогтнолыг сульдаасаар байх аюулт махчин мангас мэт авлигалчдыг шүүрдэн зайлуулах боломж хүн бүрд бий. Гагцхүү шударга шүүх, хууль ёсыг шаардах.

Д.ЭНХБАТ