Утаа бууруулахад хувь нэмэр оруулсан гэх нэрийдлээр улсын төсвөөс урамшуулал олгосон болон түүнийг авсан хүмүүсийн ичих нүүр нь элгэндээ наалдсан бололтой. Нийтдээ 1,1 тэрбум төгрөгийг улсын төсвөөр шагнал урамшуулал хэлбэрээр гаргуулан авсан баримт нь нотлох баримтыг шинжлэн судлах сонсголоор ил болжээ. Гэтэл Улаанбаатар хотын агаарын бохирдол дэлхийд тэргүүлж, нэн аюултай түвшинд очоод байгаа. Хорт хавдрын өвчлөлийн суурь шалтгаан болтлоо дэгдээд буй утааны хор уршиг нялх хүүхдүүдэд үхлийн аюултай гэгддэг чухам түүгээр далимдуулан түмний эрх ашгийг уландаа гишгэж хувьдаа цулайн, сая саяар нь урамшуулал нэрээр бэлэн мөнгө хүртэж тэр нь тэрбумаар тоологдох болчихсон нь хуулийн хариуцлага хүлээлгэх ёстой үйлдэл мөн.

Утааг бууруулах бодит алхам хийгдэхгүй удсан нь агаарын бохирдол, угаарын үхэл, цаг хугацаа, төсөв хөрөнгө авлигачид ба тэднийг өөхшүүлэн гааруулагчдын баяжих хэрэгсэл болжээ.

Гэтэл хүн амын тал хувь нь оршин суудаг Улаанбаатар хотын иргэд ирээдүйд амьд явах эрхээ алдаж, үр хүүхэд нь өвөлжин эмнэлгийн үүд сахиж байгаа нь туйлын шударга бус хийгээд утааг баяжих хэрэгслээ болгосон этгээдүүдийн нийгмийнхээ эсрэг үйлдэж буй онц хэрцгийлэл болов уу?

1 их наяд төгрөгийн алдагдалтай гэх мөртлөө ТУЗ-ийн гишүүдээ 1,1 тэрбум төгрөгөөр урамшуулсан “Тавантолгой түлш” компанид аудитын шалгалт оруулж санхүүгийн зөрчлийг нарийвчлан шалгах шаардлага үүсжээ. Аюул дагуулсаар буй агаарын бохирдлын эсрэг дорвитой өөрчлөлт гараагүй атал чухам ямар үндэслэлээр тэд шагнагдаж, ямар шийтгэл хүртэх ёстой болохоороо Улаанбаатар хотын хүн ам уушиг нь хордож, улсаараа хохирох болов?

Д.ЭНХБАТ