Сонгуулийн хууль хэрэгжиж эхлэхээс өмнө сонгогчдын саналыг татах ажлаа амжуулчих санаатай элдэв бараа таваар тарааж, сугалаа хөтөлбөр зарлаж, концерт уулзалт зохион байгуулж УИХ-ын гишүүн болохоор мөрөөдөгчид илтэд сүсэглэсээр. Харин ард түмэн хэрсүү болжээ. Хэн бодлого ярих, хэн үнэнийг илэрхийлэх, хэн эрх баригчдын алдаатай байдлыг шударгаар шүүмжлэхийг мэддэг. Өнөөх сонгууль угтаж сурталчилгааны зорилгоор бэлэг тараадаггүйгээ гайхацгааж байсан нэр бүх жижиг намууд ч элдэв өнгийн ууттай зүйл бариад энд тэнд таваргаж яваа зураг, бичлэг олон нийтийн сүлжээнд тархав.

Сонгогчдын боловсролын байдал улс төрийн намуудын төлөвшилд нэлээд чухал үүрэгтэй атал Монголд зөвхөн сонгуулийн үеэр энэ талын мэдээлэл түгээмэл тархдаг.

Олон улсад улс төрийн намууд сонгуулийн сурталчилгаагаа голчлон бодлогын мэтгэлцээн, судалгааны тайлан, шийдлийн өрсөлдөөнөөр явуулдаг байхад Монголд хөрөнгө мөнгөөр аархагчдын сунгаа маягийн зүйл болчихдог. Үүнд улс төрчид, намуудын ёс зүйн асуудал хөндөгдөнө. Тэд улс орны өмнө тулгамдаж байгаа асуудлыг бодлого судалгаанд тулгуурлан шинэчлэн өөрчилж хөгжил дэвшилд хөтлөх бус УИХ-ын гишүүн, төрийн өндөр албан тушаалд очиж даруйхан нэр хүнд, ашиг орлогын амин хувиа хичээх хүслээ гүйцэлдүүлэхээр улайрдаг донтой.

Д.ЭНХБАТ