Газар бол улсын үндэс гэсэн ухагдахуун Монгол төрийн гүн ухаан байсаар иржээ. Шинжлэх ухааны ойлголтоор бие даасан бүрэн эрхт улсын үндсэн шинж чанаруудын хамгийн чухал нь аливаа ард түмэн газар нутагтай түүн дээрээ чөлөөтэй амьдрах боломжтой бол тэр тусгаар тогтносон үндэстэн мөн гэж үздэг. Өөрөөр хэлбэл бидний амин дархлааны эх суурь бол газар нутаг. Улсын аюулгүй байдалд сөрөг нөлөөтэй аливаа үйл ажиллагаанаас сэрэмжлэх нь төрийн үндсэн чиг үүрэг болдог. Гэтэл төрийн сайд, УИХ-ын гишүүд газраа гадаадын хөрөнгө оруулагч гэх далбаан дор цагаачдын орогнол болгож болохгүй.

Ингэвэл Монгол үндэстний биеэ даасан бүрэн эрхт байдлын асуудал хөндөгдөх болно. Аливаа хууль бус, шударга бус, хүмүүн бус үйлдэл эрх тэгш байдлыг бий болгож чадаагүйгээс үүдэлтэй байдаг. Монголд хүний эрх, эрх чөлөөний ойлголтууд эрэмдэглүүлж, шударга шүүхээр шүүлгэх эрх зүйн үндэс алдагдаж баян эрх мэдэлтэй хэсэгт хууль аядуу зөөлөн харин жирийн ядуу ард түмэнд төмөр мэт хатуу хайруу. Гэтэл энэ тэгш бус байдлын замбараагүйдэл яван явсаар газар нутгийн аюулгүй байдалд заналхийлж эхэллээ.

Монголын төрд олон жил ажилласан гэх зарим сайд газар нутгаа гадаадынханд эзэмшүүлэх хуулийн төслийг УИХ-аар хэлэлцүүлэхдээ газар нутгийн аюулгүй байдалд шууд халдсан агуулга санаархалтай хуулийн төсөл гэх өдөөн хатгалгыг албаар явуулж буй нь өнөөгийн нөхцөл байдлыг өмнөхөөс эрс өөрөөр авч үзэх ёстойг сануулж байна.

Жирийн сум, баг хорооны Монгол ард газар эзэмших хүсэлтээ илэрхийлбэл 15 жилээр л эзэмших эрэх олгодог. Гэтэл гаднын хөрөнгө оруулагч гэх этгээдүүд ямар ч шалгуур татваргүйгээ Монгол Улсын газар нутгийг шууд 100 жилээр эзэмших эрхтэй болох тухай асуудал яригдаж буй нь Монгол Улс тайван замаар гадаадын улс гүрний хамааралд орох нөхцөл бүрдэх аюултайг харуулж байна. Иймд төр улсынхаа тусгаар тогтнолыг харийн хүмүүст худалдаж элэг нь буруудсан сайд гэх цол гуншинтай төрд заларсан зарим нэг этгээдийг хуулийн дагуу шалгаж, албан тушаалаас нь огцруулан зохих хариуцлага хүлээлгэхийг шаардах цаг болжээ.

Д.ЭНХБАТ