Сүүлийн 10 жилийн байдлаар усны осолд өртөж амь насаа алдсан иргэдийн 28 хувь нь бага насны хүүхэд байгаа бөгөөд эцэг, эх, асран хамгаалагчийн хариуцлагагүй байдлаас шалтгаалан гол, нуурын эрэг дээр тоглож байгаад хөл алдаж, амь насаа алдах тохиолдол өндөр байна.

Тухайлбал, энэ сарын 14-ний өдөр автомашины дотуур хаймар дээр нэгнээ түрж тоглож байгаад голын усанд живж, амь насаа алдсан харамсалтай тохиолдол цагдаагийн байгууллагад бүртгэгджээ.

Иймд цагдаагийн байгууллага болон онцгой байдлын газраас иргэддээ гол, нуурын эрэг дагуу аялж амарч зугаалахдаа бага насны хүүхдэд тавих хараа хяналтаа сайжруулах, зориулалтын бус хийлдэг гудас, хөвөгч хэрэгсэл ашиглан тоглуулахгүй байх, голын эрэг дагуу бууж, суурьшихдаа тухайн газрын онцлог, нөхцөл байдлыг судалж, эрсдэлээ тооцоолж, аюулгүй байдлаа хангахыг зөвлөж байна.

Б.ЖАРГАЛ